Саха сирин баһылыга Айсен Николаев парламеҥҥа отчуотун кэмигэр омук сирдэриттэн уонна тас регионнартан промышленноска үлэлии кэлэр кадрдары олохтоохторунан солбуйар туһунан эттэ. Депутат Павел Ксенофонтов бу этиини өйүүрүн биллэрдэ уонна тэрилтэлэри кытта кадры бэлэмнээһиҥҥэ күөрэйэр боппуруостары дьүүллэһэри эттэ.
Ил Дархан Айсен Николаев норуот депутаттарыгар дакылааттыырыгар промышленнай тэрилтэлэри олохтоох кадрынан хааччыйыы туһунан эттэ. Ааспыт сылга «Олохтоох кадры промышленноска» бырагырааманан 8000 Саха сирин олохтооҕо үлэнэн хааччыллыбыт.
Бу сыыппара — саҕалааһын эрэ. Коронавирус дьаҥа олохтоохтор промышленнай тэрилтэлэргэ үлэҕэ киириилэригэр саҥа кыахтары арыйбытын Ил Дархан бэлиэтээтэ. Баһылыгы кытта депутат, «Сахатранснефтегаз» хампаанньа кылаабынай инженерэ Павел Ксенофонтов сөбүлэһэр. Кини этиини өйүүрүн биллэрдэ, ити эрээри бу хайысхаҕа күөрэйэн тахсар боппуруостары уталыппакка быһаарар наадалааҕын тоһоҕолоото.
«Бастатан туран, кадры бэлэмнээһин. Промышленнай хампаанньалар баҕаларын хоту тута вакансияны барытын толорор кыахпыт суох. Иккиһинэн, корпорациялар үлэҕэ ылыыга, үлэлэтиигэ бэйэлэрэ туспа ирдэбиллэрдээхтэр. Айсен Сергеевич саамай сөпкө эттэ, кадры тэрилтэлэри бэйэлэрин кытта бииргэ бэлэмнээн таһаарыахтаахпыт. Бу хайысханы тутустахпытына, 2-3 сылынан квалифицированнай кадрдары бэлэмниир кыахтаахпыт», — диэтэ Ксенофонтов.
This post was published on 28.05.2020 10:01 10:01