17 От ыйа 17.07
  • 20°
  • $ 88,28
  • 96,26

«Партийнай» ыһыах ааспыта үчүгэйин!

18:10, 20 июня 2018
Текст:
Читайте нас на
Яндекс Новости
ЯДВ

Самаан сайын салаллан, сайдам санаа­лаах сахам дьоно саламалаах түһүлгэлэргэ үрүҥ тунах ыһыахтарга үмүөрүспүт кэмнэрэ. Мин даҕаны туора туран хаалбатым. Дойдубар ыҥырыылаах ыалдьыт буолан даххаһыйан тиийэн, мааныга-далбарга сырыттым, чиэстэнним-бочуоттанным.

Ол гынан, нэһилиэкпитигэр ытык дьоммут, Улуу Кыайыы туһа диэн арҕаанан-илининэн сэрии бөҕөнү сэриилэспит, тыылга үлэ бөҕөнү үлэлээн умса-төннө түспүт биир даҕаны бэтэрээн хаалаахтаабатаҕа сүрдээх. Аҕа саастаах хаарыан дьоммун ­суохтаан, ахтан-санаан, хараастаммын уйадыйталаан ыллым. Мин барааска, сэттэ уончалаах, сэттэ уоннарын ааспыт үлэ бэтэрээннэрэ кырдьыбыт аатыран, мэтээллэрбит, бэлиэлэрбит кылабачыһан кинилэри солбуйбуппут. Биһиги даҕаны, тарбахха баттанаахтыыр эбиппит. Ол иһин даҕаны анаан-минээн ыҥырыллан эрдэҕим.

Чэ, бээ, аһара суланымыахха. Олох сокуона буоллаҕа, хайыыр да кыах суох… Көлүөнэни көлүөнэ солбуйар. Хата кэрэхсээбиппин, бэркиһээбиппин кэпсиим. Дойдум дьон-сэргэ олохсуйар, төрүөх кэлэр уйгулаах сир буолбут. Күөх сирэм киэргэллэрэ сибэккилэр буолан, бу оҕо аймах элбэҕин. Мичилиспит, сандаарыспыт кыыс-уол, ыччат ыллаан-туойан, үҥкүүлээн, кыынньар кымыһынан, сыалаах үтэһэнэн күндүлээн, барахсаттар, эчи үчүгэйдэрин. Сахалыы сиэр-туом, алгыс-тойук, эҕэрдэ, араас тэрээһин киһини сылаппаттык, сэргэхтик, холкутук солбуллан иһэр. Оҕолуун, эдэрдиин-эмэнниин, дьон-сэргэ сахалыы таҥнара-симэнэрэ «биһиги, сахалар» диэн киэн туттуу кыымын саҕар.

Биһиги саҕанааҕы, сэбиэскэй кэмнээҕи партийнай мунньах аҥаардаах салгытыылаах ыһыахтар бааллара. Олору санаан сүөм түһэбин. Ол күн сүөсүһүттэр, тарбыйахсыттар, сылгыһыттар эрэйдээх­тэр этэҥҥэ сыл тахсыбыттарын махталыгар сопхуос парткомуттан Элиэнньин төбөлөөх кыраамата сыыһын ылан, үөрээхтииллэрэ. Ити кэннэ тута күрэхтэһии саҕаланара. Ахсааннаах дьахтар, эмээхсин халадаай ыр­баахы, хаһыаччык кэтээхтиирэ. Эр дьон, култуура үлэһит­тэриттэн ураты, сахалыы таҥныбыттарын өйдөөбөппүн. Сахалыы өй-санаа, омук быһыытынан үгэспит, култуурабыт суолталаммат, сайыннарыллыбат, өрө тутуллубат кэмэ этэ. Биир ньыгыл сэбиэскэй норуот буоллахпыт. Дэлэҕэ, маннык ыһыах күн, дэриэбинэҕэ соҕотох оһуокай таһаарааччыбыт Ойохтоох Охоноон улаханнык холуочуйан баран:

«Оо-йох көрдөтөр оһуокаа-ай,

Ээ-эр көрдөтөр ээһиэкээ-эй!»  — диэн этэн эҥээритэрэ, оһуокайдьыттар алларастаһа-алларастаһа хаба тардан ылаллара ырааппыт 70-с сыллар түгэхтэриттэн кулгаахпар билигин даҕаны охсуллан ааһар…

0

0
Следите за самым важным и интересным в Telegram-канале и WhatsApp-группе ЯСИА