От ыйын 16 күнүгэр СӨ Бырабыыталыстыбатыгар ыытыллыбыт мунньахха 2025 уонна 2026 сылларга оттук сезонугар бэлэмнэнии боппуруоһа дьүүлгэ турда.
Быйылгыттан сезоҥҥа бэлэмнэниини сыаналааһын саҥа “Светофор” диэн ситиминэн оҥоһуллар. Билигин бэлэмнэнии былаанын уонна итиинэн хааччыйыы схематын оҥорон официальнай биллэриигэ таһаарыы сүрүн соругунан буолар. Ол курдук, 45 муниципалитеттан 27 эрэ улуус ититии схематын, 28 эрэ оттук сезонугар бэлэмнэнии былаанын туруорбуттар.
— Сорох муниципальнай тэрээһиннэр былааннаммыт болдьохтон хаалан иһэллэр. Билигин ыйыллыбыт итэҕэстэр, сыыһалар бу нэдиэлэ түмүктэниэр диэри туоратыллыахтарын наада. Докумуоннар бэлэмнэммиттэрин кэннэ Ростехнадзор кытаанах бэрэбиэркэтин ааһыахтаахтар, ол эрэ кэннэ олохтоох салайыныы уорганнара бүтэһиктээх сөбүлэһиини ылыахтара, — диэн бырабыыталыстыба бэрэссэдээтэлин бастакы солбуйааччы сорук туруорда.
