Саха сиригэр оттук сезонун туруктаах ааһарын хааччыйар оттук-энергетическэй ресурсалары былааннаахтык тиэйии-таһыы бара турар. Бүгүҥҥү күҥҥэ анаммыт сирдэригэр уопсай кээмэй 44% тиэрдилиннэ, диэн социальнай ситимнэргэ быһа эфир кэмигэр Саха сирин дьиэ-уот коммунальнай хаһаайыстыбатын уонна энергетикатын миниистирэ Вячеслав Емельянов иһитиннэрдэ.
Хотугу тиэйии хампаанньатын чэрчитинэн барыта 576 тыһыынча туонна уматык-энергетическэй ресурсаны тиэрдии былааннанар. Былырыыҥҥы анал кэм көрдөрүүлэриттэн кыратык хаалыы баарын үрдүнэн, билигин тиэрдии тэтимин улаатыннарар эбии дьаһаллар ылыллаллар. Миниистир бэлиэтээбитинэн, биэдэмистибэлэр икки ардыларынааҕы оробуочай бөлөх, муниципальнай тэриллиилэр баһылыктара уонна таһааччылар көхтөөх үлэни ыыталлар.
Итиэннэ Вячеслав Емельянов региоҥҥа ититэр сезон кэмигэр саҕаламмытын тоһоҕолоон бэлиэтээтэ. Итии генерациятын эбийиэктэрин уотунан хааччыйыыга холбооһуҥҥа кэккэ муниципалитеттарга үөскээбит сорох технологическай уустуктар суһаллык туоратыллыбыттара. Билигин өрөспүүбүлүкэ ититэр сезон ордук тыҥааһыннаах кэмин ааста.
«Оттук муҥутуур чыпчаала ааста диэххэ сөп. Ол да буоллар, ити сынньанарга төрүөт буолбатах. Ресурсаны хааччыйар тэрилтэлэр үлэлииллэригэр үрдүк бэлэмнэнии эрэһиимэ өссө көтүрүллэ илик. Бу эрэһиим өрөспүүбүлүкэ бүтүн территориятыгар үчүгэй температуралар олохтоннохторуна уонна ититэр кэм бүтүүтүгэр эрэ уһуллуоҕа», — диэтэ Вячеслав Емельянов.
