18 От ыйа 18.07
  • 18°
  • $ 88,09
  • 96,3

Оттооһун – 2016: Сунтаардар саппааска сытар сирдэри көрдүүллэр

10:45, 12 августа 2016
Текст:
Читайте нас на
Яндекс Новости
ЯДВ

Төһө да от үүнүүтэ мөлтөх буоллар, биирдиилээн чааһынай дьон кыстыгы туоруур отун булунан эрэр. Онтон элбэх ынах сүөһүлэх, сылгылаах улахан хаһаайыстыбаларбытыгар балаһыанньа уустук.


Кинилэр улууска оттуохха сөптөөх саппааска сытар сирдэри көрдүүллэр. Кыра нэһилиэктэр сүөһүлэрин ахсаана аҕыйаҕын суотугар үгүс сирдэрэ оттоммокко хаалар. Бу оттоммот, саппааска сытар сыһыылары көрөн, оттуохха сөптөөҕү булан, чугас нэһилиэктэртэн мобильнай биригээдэлэр тэриллэн оттуу тахсыахтаахтар.

Бу нэдиэлэҕэ тыа хаһаайыстыбатын управлениета Хадан нэһилиэгэр саппааска сытар сирдэрин көрдө. Управление начаалынньыга Иван Тихонов, Хадан нэһилиэгин баһылыга Александра Павлова, исписэлиистэр буолан сырыттылар. Ааһан иһэн көрдөххө хас да сиргэ күрүөнү толору курулаан турар от элбэх. Аара көрсүбүт отчуттарбыт «кыһыны туоруурбутугар сөп буолар оппутун булуннубут» дэһэллэр.

Кубалаах, Туойдаах киэҥ сыһыыларын кэрийэн көрдүбүт. Ото кылгас да буоллар хойуу соҕус, аһара тараҕай буолбатах. Сэтиэнэхтээх, талах үүнүтэлээн эрэр эбит. Тыраахтар роторнай хотуурунан оҕустаран ыллахха эрэ. Хадан нэһилиэгин бу икки сыһыытыгар уонна «Таала» диэн сиригэр Илимниир хаһаайыстыбалара мобильнай биригээдэ тэринэн тахсан оттуохтарын сөп курдук.

Салгыы бу курдук саппааска сытар сирдэри көрө Толооҥҥо тахсыы былааннанар. Күүкэйдэр эмиэ сир көрдүүллэр, онтон чугас нэһилиэккэ саппаас сири булуохха наада.

Следите за самым важным и интересным в Telegram-канале и WhatsApp-группе ЯСИА