23 От ыйа 23.07
  • 18°
  • $ 87,78
  • 95,76

Отчуттары ардах атахтаан, от үлэтигэр бытаарыы таҕыста

11:34, 28 июля 2018
Текст:
Читайте нас на
Яндекс Новости
ЯДВ

Бу нэдиэлэтээҕи тиһэх дааннайынан, Саха сирин ходуһаларыгар 85030 гектар иэннээх сир охсулунна, 54919 туонна от кэбиһилиннэ. Ити сыллааҕы былаан 11,2 бырыһыаныгар тэҥнэһэр, былырыыҥҥы туһааннаах кэмтэн 34 бырыһыанынан ордук. Ол гынан баран, кыраапыктан хаалыы улахан: 51 бырыһыана эрэ ситиһилиннэ.


Маныаха буруйдаах – халлаан. Отчуттары өрөспүүбүлүкэ үгүс өттүгэр ардах атахтаата. Ньурба, Нам, Бүлүү, Горнай улуустарын ходуһалара эрдэ курааҥҥа хаптаран бараннар, хата, кэлиҥҥи ардахтар табаннар, кыратык өрүттүөхтэрэ, өҥсүйүөхтэрэ диэн эрэнэ күүтэллэр. Мэҥэ Хаҥаласка, Хаҥаласка, Аммаҕа, Үөһээ Бүлүүгэ, Чурапчыга, Тааттаҕа элбэх сыллаах орто үүнүү бэлиэтэнэр. Ленскэй, Өлүөхүмэ, Хаҥалас, Нам улуустарыгар уонна Дьокуускайга Өлүөнэ өрүс арыытыгар баар ходуһалары халаан уута былдьаата. Уу таһыма кыралаан түһэр.

От үлэтин тэрээһиннээхтик саҕалаабыт Амма 7187, Мэҥэ Хаҥалас 6613, Уус Алдан 5367, Чурапчы 5067, Таатта 3832, Хаҥалас 3596 туонналыы от кэбиһиилээхтэр. Саамай уустук балаһыанньа хотугу улуустарга үөскээтэ: ардахтан, ууттан хаайтаран, сайын баччатыгар диэри ходуһаҕа киирэ иликтэр. Билиҥҥи туругунан, өрөспүүбүлүкэ үрдүнэн ыраах уонна атын улуустарга тиийэн оттуурга анаан 99 мобильнай биригээдэ тэрилиннэ. Ити эрээри, көмө харчы хамныы илик. Айылҕа кубулҕатыттан эмсэҕэлээбит улуустарга мобильнай биригээдэлэри тэрийэн үлэлэтэр ороскуоттарын толуйарга 21,8 мөл. солк. кээмэйдээх көмө оҥоһулларын туһунан бырабыыталыстыба дьаһала билиҥҥэ диэри сөбүлэһиннэриигэ «сүүрэ сылдьар» сураҕа иһиллэр.

Василий НИКИФОРОВ, «Саха сирэ» хаһыат, edersaas.ru

Следите за самым важным и интересным в Telegram-канале и WhatsApp-группе ЯСИА