Саха сирин киин оройуоннарыттан, халаан уутуттан эмсэҕэлээбит Өймөкөөн улууһугар, 180 туонна от тиэммит 14 улахан массыына айанната, онтон 60 туоннатын Уус Алдан улууһун аграрийдара, өссө 120 тоннатын Мэҥэ Хаҥалас улууһун аграрийдара биэрдилэр.
Сүөһү аһылыга быйыл үчүгэйдик оту ылбыт илин эҥэр улуустарын саппаас пуондаларыттан ылылынна, ол туһунан тыа хаһаайыстыбатын министиэристибэтэ эттэ.
Биэдэмистибэ баһылыга Артем Александров этэринэн, Өймөкөөн оройуонугар сүөһү аһын бэлэмнээһин балаһыанньата ураты хонтуруолга сылдьар. Миниистир ааспыт нэдиэлэҕэ Өймөкөөҥҥө миэстэтигэр баран балаһыанньаны билсэн, көрөн, дьону кытта кэпсэтэн кэлбитэ.
Өймөкөөн оройуонун кэтэх уонна бааһынай хаһаайыстыбаларыгар анаммыт от уопсай кээмэйэ 1164 туонна кэриҥэ. Таһаҕас барыта Уус-Ньара, Өймөкөөн, Томтор, Төрүт уонна Үчүгэй нэһилиэнньэлээх пууннарыгар тиэрдиллиэҕэ, ити сүөһүлээхтэр кыстыкка төбө ахсаанын аҕыйаппаттарын хааччыйар кыахтаах.
