12 От ыйа 12.07
  • 22°
  • $ 87,99
  • 95,68

Оскуолабыт – нэһилиэкпит киэн туттуута

09:29, 14 января 2016
Текст:
Читайте нас на
Яндекс Новости
ЯДВ

— Оскуолабытыгар 151 оҕо үөрэнэр, олортон 45 үөрэх ударнига, 12 үөрэх туйгуна бааллар, үөрэххэ ситиһии 100% буолла. Оҕолорбут өрөспүүбүлүкэтээҕи инникигэ хардыыга ситиһиилээхтик кыттан, үөрэххэ быһа киирэр суругунан, дипломнарынан наҕараадаламмыттара. Быйылгы НПК-ҕа Саввинов Толя, Фролов Коля, Федорова Лиза регион чиэһин көмүскээтилэр. Фролов Коля өрөспүүбүлүкэтээҕи Андреевскай ааҕыыларга бастаан, «Океан» лааҕырга форумҥа кыттан, сынньанан кэлбитэ. «Ситис» дьоҕурдаах оҕолору үөрэтэр кииҥҥэ Саввинов Саша (10 кылаас), Саввинов Толя (9 кылаас), Константинова Саша (6 кылаас), Дмитриева Июлия (6 кылаас) бастакы, иккис миэстэни ыллылар.

Үөрэх туйгуннарын, бастыҥнарын слёта ыытыллан, 33 номинациянан стипендиаттар наҕараадаламмыттара.

Оскуола базатыгар ССРС спордун маастара М. Аммосов бирииһигэр көҥүл тустууга, Д. Степанов бирииһигэр волейболга, В.П. Иванов бирииһигэр теннискэ улуус таһымнаах күрэхтэһиилэри үрдүк таһымҥа тэрийэн ыыттыбыт, элбэх спонсор, фанаттар өйөбүл, күүс-көмө буоллулар.

Сайыҥҥы сынньалаҥ тэрээһиннээхтик ааста. Оҕолор «Үс кут» лааҕырга уонна сайылыктарга дьоннорун кытта үлэлэстилэр. Нэһилиэги тупсарыыга 10 үөрэнээччи, «Васильев А.В.» ИП 7 оҕо от үлэтигэр, хортуоппуй үүннэриитигэр үлэлээн, үрдүк көрдөрүүнү ситистилэр.

«Күндэйээнэ» оҕо тэрилтэтэ бастыҥ үлэтинэн СӨ үөрэҕин министиэристибэтин грамотатынан бэлиэтэннэ. Оҕо уһуйааннарын көрдөһүүлэринэн биир бөлөҕү оскуолаҕа астыбыт.

Саамай улахан ситиһиибитинэн СӨ Ил Дархана үөрэҕирии салаатын өйөөһүҥҥэ 1 мөлүйүөннээх граннары 37 оскуолаҕа анаабытын туһунан дьаһала бу күннэргэ биллэн, Күндэйэ орто оскуолата 1 мөлүйүөнү ылар чиэскэ тигистэ. Бу үрдүк наҕараада нэһилиэк, төрөппүттэр, оҕолор, бары оскуола коллективын бииргэ сомоҕолоһон сыралаах үлэлээһиннэрин түмүгэ буолар диэн сыаналыыбын.

Маны сэргэ агро-оскуолалар материальнай-техническэй базаларын хаҥатыы күрэһэр 5 бастыҥ иһигэр киирэн, МТЗ тракторы ылар гранынан наҕараадаланныбыт. Улуус дьаһалтата (баһылык Григорьев А.В). оскуолаҕа үлэ уруогун мастарыскыайын тутууну үбүлээһиҥҥэ көмөлөһөргө бэлэмин эппитэ, онно эрэлбит улахан.

Сунтаар улууһун үөрэҕирии салаатын кытта (начальник Еремеев Г.М.) ыкса сибээстээхтик үлэлиибит, кинилэр өйөбүллэригэр махталбыт кэмэ суох. Учууталларбыт сыл аайы билиилэрин таһымын үрдэтэр куурустарга, араас куонкурустарга, НПК-ҕа кыттан, анал аат ылаллар. Оскуола киэн туттар үрдүк таһымнаах учуутала Максимова Н.Н. учууталлар XIII съезтэригэр кыттан кэлбитэ.

Саҥа дьылы көрсө Президент Ёлкатыгар XI кылаас туйгун үөрэнээччилэрэ Анисимова Аня, Фёдорова Лиза кытыннылар. СӨ үөрэҕин министиэристибэтин бирикээһинэн оскуолаҕа мультимедийнай комплекс ананан, сотору кэминэн аҕалыллан таҥыллыаҕа. Эппитим курдук, быйылгы ситиһиилэрбит инникигэ элбэх эппиэтинэһи сүктэрэллэр. Биир сиргэ тэпсэҥнии турбаппыт, былааммыт, сорукпут элбэх, онон күүстээх, далааһыннаах биир сомоҕоһуулаах үлэ күүтэр! – диэн санаатын үллэһиннэ Маргарита Николаевна.

Күндэйэ орто оскуолатын эдэр, түмсүүлээх коллектива барыбытыгар дьоҕурун, сатабылын ууран салгыы таһаарыылаахтык үлэлиэҕэ , оскуола нэһилиэк киэн туттуута, эрэлэ буоларын өссө да дакаастыа, үлэтинэн көрдөрүө.

Феврония Николаева. Күндэйэ

Следите за самым важным и интересным в Telegram-канале и WhatsApp-группе ЯСИА