Саха сиригэр оскуола оҕолоругар «Билии: Олоҥхо-2025 »дистанционнай олимпиаданы ыытыахтара. Сайаапкалар сэтинньи 25 күнүгэр диэри өрөспүүбүлүкэ үрдүттэн 1 — 11-с кылаас үөрэнээччилэриттэн ылыллаллар.
Олимпиада Олоҥхо декадатыгар уонна ЮНЕСКО саха норуотун героическай эпоһын киһи-аймах тылынан уонна материальнай буолбатах нэһилиэстибэтин шедевринэн билиммитэ 20 сылыгар ананар. Тэрийээччилэр — регион культуратын уонна духуобунай сайдыытын министиэристибэтэ уонна Саха сирин норуоттарын музыкатын уонна фольклорун музейа.
Олимпиада сорудахтара музей саайтыгар сэтинньи 26 күнүгэр бэчээттэниэҕэ. Ахсынньы 5 күнүгэр түмүктүөхтэрэ.
«Олимпиада кыайыылаахтарын уонна лауреаттарын барыларын дипломнарынан наҕараадалыахтара. Хас биирдии кыттааччы ыйыллыбыт электроннай аадырыһыгар кыттааччы электроннай туоһута ыытыллыаҕа. Тэрээһиҥҥэ кыттыы үөрэнээччилэргэ Олоҥхо баай культурнай нэһилиэстибэтигэр интэриэһи сайыннарыыга көмөлөһөр», — диэн тэрийээччилэр бэлиэтээтилэр.
This post was published on 12.11.2025 15:33 15:33