24 Тохсунньу 24.01
  • -48°
  • $ 73,82
  • 83,32

Орто Халыматтан Игорь Созонов ситиһиитэ биир дойдулаахтарын үөртэ

17:01, 04 ноября 2021
Текст:

Бу күннэргэ Грузия Бакуриани куоратыттан үөрүүлээх сонун Орто Халымаҕа кэллэ. Манна алтынньы 26-29 күннэригэр харахтарынан көрбөт спортсменнарга пауэрлифтиҥҥа Аан дойду уонна Европа чемпионаттара ыытылыннылар. Онно биир дойдулаахтара Игорь Созонов кэккэ ситиһиилэрдэннэ.

Игорь Созонов троеборьеҕа (присед, жим, тяга) Аан дойду Чемпионун үрдүк аатын ылла, сытан эрэн өрө анньыыга (жим лежа) үрүҥ көмүс мэтээли түөһүгэр кэттэ, оттон Европа чемпионатыгар троеборьеҕа эмиэ бастакы миэстэни ылан, Европа Чемпиона буолла. Ону тэҥэ сытан эрэн анньыыга 2 миэстэҕэ тиксэн, пьедесталга таҕыста.

Бу иннинэ Игорь 2018 сыллаахха Египеккэ буолбут Аан дойудутааҕы чемпионакка Россия сүүмэрдэммит хамаандатыгар киирсэн, сытан эрэ өрө анньыыга Аан дойду биэс төгүллээх чемпионун кыайан турардаах. Онно Россия хамаандата иккис бочуоттаах миэстэҕэ тиксэн, биһиги уолбут Сахатын сирин, Халыматын, Өлөөкөтүн аатын ааттаппыта, барыбытын олус үөрпүтэ.

Игорь бу спорт көрүҥнэринэн 2012 сыллаахтан дьарыктанар. Кини спорт улахан түһүлгэтигэр киириитэ 2013 сыллаахха доруобуйаларынан хааччахтаах дьон ортолоругар Пекиҥҥэ ыытыллыбыт Аан дойдутааҕы чемпионакка үрүҥ көмүс мэтээллээх төннүүттэн саҕаламмыта. 2014 сыллаахха Алексин куоракка ыытыллыбыт Россия чемпионатыгар спорт маастарыгар хандьыдаат нуорматын толорбута. Бу барыта утумнаах дьарыктан, элбэх сыраттан турар.

Игорь тренерэ — РФ уонна СӨ Үтүөлээх тренерэ Петр Николаевич Давыдов буолар. Кини 2018 сыллаахха биэрбит интервьютугар маннык диэбиттээх: «Билиҥҥи сыалбыт — Россия таһымнаах чемпионакка кыайан, салгыы Аан дойду түһүлгэтигэр тахсарга дьулуһуу, аны түөрт сылынан Аан дойду абсолютнай чемпиона буоларга үлэлэһии!»

Көрөрбүт курдук, уһуйааччы сыала, спортсмен соруга ситиһиллибиттэр. Уолбут тиритиилээх-хорутуулаах түөрт сыллаах утумнаах дьарыга улахан кыайыыга тириэртэ. Онон, биһиги Өлөөкөттөн төрүттээх, Бастакы Хаҥаластан хааннаах Созоновтар удьуордаах Игорьбытын үрдүк ситиһиитинэн киэн тутта эҕэрдэлиибит, доруобуйаны, дьолу, инники өссө да үгүс кыайыылары-хотуулары баҕарабыт.

Ааптар: Изабелла Ноговицына

2
0
Тутаах тыллар
24 января 24.01
  • -48°
  • $ 73,82
  • 83,32