Авиалесоохрана Орто Халыма оройуонугар арыллыбыт саҥа отделениетын штата толору хааччылынна, начальнигынан Николай Михайлов ананна. Бу туһунан кулун тутар 18 күнүгэр Саха сиринээҕи ойууру авиационнай харыстааһын базатыгар иһитиннэрдилэр.
Саҥа үлэһиттэр ортолоругар радиооператордар, летчик-кэтээн көрөөччүлэр уонна парашютнай-десантнай баһаарынай сулууспа үлэһиттэрэ бааллар. Барыта — 30 киһи. «Бары медицинскэй хамыыһыйаны ааһан үлэҕэ ылыллыбыттар», – суруллар иһитиннэриигэ.
Ааспыт өрөбүлгэ Орто Халыма оройуонугар Саха сирин Авиалесоохранатын начальнига Владимир Леонов сырытта. Сырыытын кэмигэр саҥа коллективы кытта көрүстэ уонна кинилэри кытта производственнай боппуруостары дьүүллэстэ.
Үлэһиттэр эрчиллиилэрэ кулун тутар 25 күнүн кэнниттэн Орто Халымаҕа саҕаланыаҕа. Онно анаан Дьокуускайтан ПДПС инструктордара уонна авиазвено хамандыыра барыахтара.
This post was published on 18.03.2026 16:01 16:01