Опера уонна балет судаарыстыбаннай театра музалар уруһуйдаах урукку логотибын төнүннэриэҕэ. Ол туһунан СИА-ҕа тэрилтэ саҥа салайааччыта Владислав Левочкин эттэ.
«Оннук, биһиги урукку логотиппытын төнүннэрэбит. Билигин бланкаларга, кумааҕы ыҥырыыларга уларытыы барар. Виртуальнай киэпкэ музалар уруһуйдаммыт үгэскэ кубулуйбут логотибы туттабыт», — диэтэ Владислав Левочкин.
Кини эбии бэлиэтээбитинэн, өрөспүүбүлүкэ тас өттүгэр тахсар тэрээһиннэргэ анаан туспа логотип толкуйданар, онно Саха сирин көстүүтэ баар буолуохтаах.
Санаттахха, урукку дириэктэр Сергей Юнганс, театры 2019 — 2022 сылларга салайбыт, тэрилтэ аатыгар «Государственный театр оперы и балета» диэнтэн «Саха Опера Балет» оҥорууга ребрендинг ыыппыта. Онно логотип уларыйбыта.
This post was published on 23.01.2023 17:31 17:31