СИА - Олох-дьаҺахСүрүн сонуннарТыа хаһаайыстыбатаУопсастыба

"Омурҕан" бырайыак сайыҥҥы тэрээһинин сылгы иитээччилэргэ анаата

Мэлдьэхси нэһилиэгин сынньалаҥ киинэ «Омурҕан» бырайыагын Дьөһөгөй оҕотун көрө-истэ сылдьар сылгыһыт дьоҥҥо анаан ыытта. Өрөспүүбүлүкэ бары муннуктарыттан хаартысканан аһаҕас күрэх куйаар ситиминэн буолла.

Куонкурус өбүгэ саҕаттан илдьэ кэлбит төрүт дьарыкпытын киэҥ эйгэҕэ таһаарар сыаллаах ыытылынна. Сүрүн соруктарынан: тыа сиригэр олорор үлэһит дьону сырдатыы, Дьөһөгөй оҕото симэнэр сэбин-сэбиргэлин үйэтитии уонна сайыннарыы, саха эр киһитэ таҥнар таҥаһын киэҥ эйгэҕэ көрдөрүү буолар.

Сэргэх, сонун тэрээһиҥҥэ дойдуларыгар бэриниилээх, үтүө үлэһит сылгыһыт дьоммут: кырдьыбат кырдьаҕас Мооруктан эдэр кэскиллээх сылгыһыт Г.С.Скрябин бааһынай хаһаайыстыбата Станислав Скрябин, Уол Табаҕаттан Поликарп Васильев («Тумарык» бааһынай хаһаайыстыба), Чурапчы Дириҥиттэн Михаил Корякин (агро-оскуола), Хаҥалас улууһун 2-с Дьөппөнүттэн Роман Федоров, Хаҥалас Өктөмүттэн Марк Лиханов («Улахан алаас» хаһаайыстыба), Тулагы Киллэмиттэн Иван Федоров, Сунтаар Күүкэйиттэн Артем Архангельскай, Хотун Бүлүү Бөкчөҥөөтүттэн Василий Петров кытыннылар.

Кыайыылаах аатын Бүлүү улууһун Бөкчөөҥө нэһилиэгиттэн Василий Петров сүктэ. Иккис миэстэ Сунтаар улууһуттан Артем Архангельскай, үһүс ‒ Станислав Скрябин, төрдүс ‒ Чурапчыттан Михаил Корякин буоллулар. Анал ааттарга «Дьоҕурдаах сылгыһыт» ‒ Поликарп Васильев, «Сындыыстаах сылгыһыт» ‒ Роман Федоров, «Урааҥхай сылгыһыт» ‒ Марк Лиханов, «Тулуурдаах сылгыһыт» ‒ Иван Федоров тигистилэр. Кыттааччыларбытын кими да матарбакка, барыларын өттүк харалаан үөрэн-көтөн ыһыахпыт күнүн атаардыбыт.

Кыттааччылар бары да уһулуччу буоланнар, дьүүллүүргэ судургута суох этэ. Бу ‒ бастакы саҕалааһын буолар.

«Бырайыакпар үлэлэспит дьоммор-сэргэбэр махтанабын. Аны сайын сайылыктары, ходуһалары кэрийэн үлэһит тыа сирин дьонун сынньалаҥын бииргэ атаарыахтаахпыт», — диэн суруйда Матрена Сыромятникова, «Омурҕан» өрөспүүбүлүкэтээҕи бырайыак ааптара https://www.instagram.com/gazetaerkeii/

This post was published on 24.06.2021 15:01 15:01

КоневодствоМегино-Кангаласский улусселосельское хозяйство