"Омук Киэн Туттуута" бириэмийэҕэ сайаапкалары ылыы саҕаланна

Россия норуоттарын этнокультурнай сайдыытыгар уонна биир буолууларын бөҕөргөтүүгэ тус кылаатын иһин «Омук Киэн туттуута» бүтүн Россиятааҕы уопсастыбаннай бириэмийэни сыллата Россия норуоттарын Ассамблеята ыытар. 2025 сылга бириэмийэ куонкуруһа икки түһүмэххэ ыытыллар: регионнар икки ардыларынааҕы (уокурук) таһымыгар уонна федеральнайдааҕы – Москваҕа норуот биир сомоҕо буолуутун Күнүгэр аналлаах тэрээһиннэр чэрчилэринэн бириэмийэ лауреаттарын наҕараадалааһын үөрүүлээх сиэрэ-туома ыытыллар. Уһук Илиҥҥи уокурук бириэмийэтин регионнар икки ардыларынааҕы (уокурук) түһүмэҕэ алтынньы 11 күнүгэр Дьокуускайга буолуоҕа.

Сайаапкалары ылыы балаҕан ыйын 30 күнүгэр диэри бириэмийэ официальнай порталыгар ыытыллар.

Бириэмийэ 7 номинациянан бэриллэр:

— гражданскай биир сомоҕолоһууну уонна омуктар икки ардыларынааҕы сөбүлэһиини хааччыйыыга кылааттарын иһин;

— төрөөбүт тыллары харыстааһыҥҥа уонна сайыннарыыга кылааттарын иһин;

— Россия норуоттарын культураларын харыстааһыҥҥа уонна сайыннарыыга кылааттарын иһин;

— судаарыстыбаннай национальнай бэлиитикэни информационнай өйөөһүҥҥэ кылаатын иһин;

— национальнай сыһыаннаһыылар эйгэлэригэр бастыҥ практиктарын иһин;

— национальнай-культурнай түмсүүлэргэ көдьүүстээх лидерствотын иһин;

— Өй көлүөнэтэ.

Тэрийэр Комитет чилиэннэринэн «Барыларыгар соҕотох”диэн анал номинация эмиэ ананна.

Кандидатуралары туруорар бырааптаахтар уопсастыбаннай тэрилтэлэр, «Россия норуоттарын Ассамблеятын » Саха сиринээҕи региональнай салаатын оройуоннааҕы куораттааҕы салаалара, Саха сирин норуоттарын Ассамблеялара, Саха Сирин Хотугу сир төрүт олохтоох аҕыйах ахсааннаах норуоттарын Ассоциациялара, судаарыстыбаннай национальнай бэлиитикэни олоххо киллэриигэ кыттар культурнай түмсүүлэр, судаарыстыбаннай уонна муниципальнай тэрилтэлэр, культура тэрилтэлэрин уус-уран, учуонай уонна научнай (научнай-методическай) сэбиэттэрэ, омуктар икки ардыларынааҕы сыһыаннаһыыларга үлэни ыытар үөрэх уонна научнай тэрилтэлэр, салаалар союзтара уонна ассоциациялара уо.д. а.

Бириэмийэҕэ кыттыы уопсастыба билиниитин, идэҕэ үрдээһин, туһалаах билсиилэри кэҥэтэргэ уонна федеральнай таһымҥа бэйэ бырайыагын эбэтэр ситиһиитин биллэрэргэ кыаҕы биэрэр.

Балаһыанньаны кытта билсэн, тэрийээччи өттүттэн консультация ылан, официальнай порталга сайаапка түһэриэххэ сөп.