22 От ыйа 22.07
  • 18°
  • $ 88,02
  • 96,04

Омугумсуйууну күөртээччилэргэ киирэн биэримэҥ!

12:44, 06 февраля 2017
Текст:
Читайте нас на
Яндекс Новости
ЯДВ

Быраабы араҥаччылыыр уорганнар Интэриниэккэ уонна социальнай ситимнэргэ суруллар тылга-өскө болҕомтолорун уурбуттара хас да сыл буолла. Кыраҕытык кэтииллэр-маныыллар. Бу туһунан edersaas.ru ааҕыҥ.   


Улаханнык саҥарыллыбат эрээри, чуолаан, биһиги өрөспүүбүлүкэбитигэр Интэриниэт ситимигэр экстремистскэй дьайыылары оҥорууга ыҥырыы, омугунан абааһы көрүүнү, өстөһүүнү күөртээһин чахчылара кэлиҥҥи кэмҥэ соччо-бачча биллибэттэр. Арай былырыын Таатта кыыһа Санаайа Талбан холуобунай дьыалата айдааны таһаара сылдьыбыта. Кинини усулуобунай миэрэҕэ тардыбыттара.

Дьэ ол эрэн, бу нэдиэлэҕэ батсаап араас бөлөхтөрүттэн тилийэ көппүт биир сурук эмиэ долгуйууну үөскэтиэн, уолҕамдьы майгылаах ыччаты ол-бу содулга тиэрдиэн сөп курду ис хоһоонноох. Ол иһин бу ыстатыйаны суруйарга сананным.

Буоларын курдук, итинник «анонимнай» дэнэр суруктар ааптардара ааттарын-суолларын, кимтэн кииннээхтэрин, хантан хааннаахтарын ыйбатахтар. Ол өйдөнөр.

Бу баар, ол сурук (орфографиятын көннөрдүм):

«Сахам сирин олохтоохторо! Бу уордайбыт, хомойбут кыргыттар суруйан эрэбит. Биһиги бэйэбит, төрөөбүт -үөскээбит Сахабыт сиригэр сатаан көмүскэммэппит хомолтолоох. Ити кэлии омуктар тугу баҕар гынан ааһыахтарын сөп, ким да онно наадыйбат. Арай тойон, туох эрэ улахан үлэһит киһи оҕото буоллаххына эрэ, туох эрэ оҥоһуллар. Оттон биһиги, боростуой, тойон, хотун ийэтэ-аҕата суох дьон, тоҕо сиргэ тэпсиллэхтээхпитий?! Саатар буолаары буолан, кэлии омуктартан.

Бу икки күн анараа өттүгэр биһиги дьүөгэбит үлэтигэр бэйэтин кэллиэгэтэ, өссө дьээдьэ киһи илиитин көтөхпүт, кырбаабыт. Туох да биричиинэтэ суох. Дьүөгэбит саҥа ыал буолбута, бородуукта маҕаһыыныгар үлэлии сылдьар. Ол хара омуктарга олох да наадыйбат. Бэйэтэ сөҕөн, хомойон олорор.

Аны кэргэнэ көмүскэһэ тиийбитигэр, иккиэ буолан саба түспүттэр, кырбаабыттар. Көннөрү, охсуһуута суох кэпсэтиэххэ диирин истибэтэхтэр. Полицияны, «скорайы» ыҥырбыттар, сайабылыанньа суруйбуттар даҕаны, диаспора көмүскэһиэ, ситинник, туох да миэрэтэ суох хаалыа диэн куттанабыт.

Биһиги дьээдьэлэрбит, холобура, баран тыппаттар ээ, кинилэр чүөчэлэрин. Онтон манна оннук буолбатах. Номнуо хаһыс да түбэлтэ, хара омуктар илиилэрин көтөҕүүлэрэ, биһиэнэ эрэ буолбатах.

Ону биһиги ыйытаары гынабыт, ким ол айылаах кинилэри «крышалыырый»? Тоҕо куруук накаастабыла суох хаалалларый? Бэйэлээх бэйэбит дойдубутугар сатаан көмүскэммэппит абалаах даҕаны, кыһыылаах даҕаны! Тоҕо итинник гыналларый, кэлии омуктар? Сэнээн буолуо, сэрэйэн көрдөххө. Күүстээх репост.

Бу сурук туһааннаах киһиэхэ тиийэр ини дии саныыбын. Биир дойдулаахтарбыт, өйөөҥ-өйдөөҥ. Бэйэ-бэйэбитин көмүскэммэтэхпитинэ, биһигини тэпсэн ааһаллар».

Бу суругу ааҕа олорон сэрэйдэххэ, ааптар олоххо буолбуту суруйбут курдук. Ол эрэн, төһө да полицияҕа сайабылыанньа суруйбуппут, «суһал көмөнү» ыҥырбыппыт диэтэр, улууһун, куоратын, аатын-араспаанньатын ыйбатах. Ол аата маннык суругу социальнай ситиминэн туох сыаллаах тарҕаппытый?

Ити түбэлтэ чахчы ханна, хаһан буолбутун чуолкайдыыр санааттан, «Саха сирэ» хаһыат уонна edersaas.ru сайтпыт аатыттан Ис дьыала министиэристибэтигэр ирдэбил-сурук ыыппыппыт, онуоха маннык хоруйу туттубут:

СӨ Ис дьыалаҕа министиэристибэтин пресс-сулууспата:

Ити суругунан бэрэбиэркэ ыыттыбыт, ол түмүгэр, итинник ис хоһоонноох сайабылыанньа ханнык да полиция отделыгар киирбэтэҕэ билиннэ.

Батсаап мессенджер көмөтүнэн араас информацияны атастаһыы үчүгэйдээх эрээри, мөкү өрүттэр эмиэ бааллар. Ол — саарбах «источниктар» дьиҥэ, оруна суох, сороҕор олох даҕаны өйтөн айыллыбыт сымыйа сибидиэнньэлэри тарҕатыылара.

Убаастабыллаах Саха сирин олохтоохторо! Батсаап ситими туһанааччылар! Итинник суруйууларга, иһитиннэриилэргэ критическэйдик сыһыаннаһаргытыгар сүбэлиибит. Тоҕо диэтэр, итинник суруктарга омугумсуйууну күөртээһиҥҥэ ыҥырыылар, биирдиилээн дьону биитэр социальнай бөлөҕү, ону тэҥэ, судаарыстыба тутулун үөҕүү баар буолаллар.

Хобдох содулга тиийбэт туһуттан, итинник суруйуулары, иһитиннэриилэри салгыы тарҕаппаккытыгар көрдөһөбүт.

РФ Холуобунай кодексатын 282-с ыстатыйатынан көрүллэр накаастабыл миэрэтэ — 100 тыһ. солк. — 300 тыһ.солк. диэри суумалаах ыстараап биитэр икки-үс сылга ылар хамнаһын саҕа суумалаах ыстараап, биитэр 360 чааска диэри булгуччулаах үлэ, биитэр биир сылга диэри болдьоххо көннөрүнэр үлэ, биитэр 4 сылга диэри болдьоххо кыһалаҥ үлэ, биитэр ити болдьоххо көҥүлү быһыы.

Маныаха бэлиэтээн эттэххэ, бу ыстатыйа 2-с чааһынан көрүллэр накаастабыл өссө ыараан биэрэр.

Следите за самым важным и интересным в Telegram-канале и WhatsApp-группе ЯСИА