Олунньу 7 күнэ. 1812 сыллаахха Чарлз Дикенс төрөөбүт - Бикипиэдьийэ

1812 сыллаахха бу күн биллиилээх Англия суруйааччыта Чарлз Дикенс төрөөбүт. Тыыннаах эрдэҕинэ ааҥыл тыллаах суруйааччылартан саамай ааҕыллар суруйааччы буолбута. Кини айымньылара хас да тылынан тылбаастаммыта, ол иһигэр нууччалыы. «Приключения Оливера Твиста», «Большие надежды», «Тяжелые времена», «Холодный дом», «Рождественские повести», «Жизнь Дэвида Копперфилда, рассказанная им самим» романнара уонна бастакы «Посмертные записки Пиквикского клуба» айымньыта ааҕааччы кутун туталлар.

Бэлиэ күннэр Арассыыйа — Арассыыйа бизнес-үөрэхтээһинин күнэ

•  Япония — Хотугу территориялар күннэрэ

Түбэлтэлэр

• 1855 — Арассыыйа уонна Дьоппуон ыккардыларыгар «мэлдьитин эйэни уонна истиҥ доҕордоһууну» биллэрбит Симода трактата диэн дуогабар түһэрсиллибит. Симода трактатын чэрчитинэн Курил арыыларыгар киирсэр Кунашир, Итуруп, Шикотан уонна Хабомаи Дьоппуон киэннэрэ буолбуттар.
• 1922 — 5-с Кыһыл знамялаах аармыйа Реввоенсоветын уурааҕынан Иннокентий Михайлов — Харачаас сахалартан бастакынан Кыһыл Знамя уордьанын ылбыт. Амма солобуодатыттан улахан суолталаах илдьити Дьокуускайга тиэрдэр сэрэхтээх сорудаҕы толоро барбыт үс киһиттэн кини соҕотох ордубут.
• 1927 — Дьокуускайга I Бүтүн Саха сиринээҕи кыра омуктар сийиэстэрэ саҕаламмыт, олунньу 13 күнүгэр түмүктэммит. Сийиэскэ 27 эбэҥки, чукча уонна дьүкээгир омуктарын дэлэгээттэрэ 11 улуустан мустубуттар.
• 1984 — Америка астронавта Брюс Маккэндлесс бастакынан аһаҕас космоска скафандрдаах эрэ босхо көппүт.
• 1992 — «Саха Өрөспүүбүлүкэтин Конституциятын суутун туһунан» сокуон ылыныллыбыт.
• 1992 — Европа Сойууһун олохтуур Маастрихт дуогабара түһэрсиллибит. Европа Сойууһа биир өттүттэн судаарыстыбалар холбоһуктара буолар, биир өттүттэн бэйэтэ судаарыстыба буолар. Билигин Европа Сойууһугар 27 дойду киирэр, нэһилиэнньэтин ахсаана 453 мөлүйүөн киһи, экэниэмикэтин сабардамынан быһа холоон АХШ уонна Кытай тэҥнээхтэрэ.

Төрөөбүттэр

• 1812 — Чарлз Дикенс — биллиилээх Англия суруйааччыта. Тыыннаах эрдэҕинэ ааҥыл тыллаах суруйааччылартан саамай ааҕыллар суруйааччы буолбута.
• 1901 — Виктор Захаров — Эмэлдьээктээҕи сүлүүдэлээх сир арыйааччыта, Аҕа дойду Улуу сэриитин кыттыылааҕа. Аҕа дойду сэриитин I ст. уордьанын, Кыһыл Сулус уордьанын кавалера, «Хорсунун иһин» мэтээл хаһаайына, Алдан улууһун ытык киһитэ (1967).
• 1906 — Пу И (Айсиньгёро Пуи) — Кытай бүтэһик эмпэрээтэрэ (1908—1912).
• 1941 — Галина Кондрашова-Доброскок — А. С. Пушкин аатынан Нуучча драматическай тыйаатырын артыыһа, Саха Өрөспүүбүлүкэтин норуодунай артыыһа (1995).
• 1953 — Егор Неустроев — Тулуйхан — саха композитора, Саха Өрөспүүбүлүкэтин ускуустубатын үтүөлээх диэйэтэлэ. Амма улууһун өрөгөйүн ырыатын музыкатын суруйбут.
• 1963 — Ньургун Тимофеев — саха бэлиитигэ, 2005—2008 сылларга Ил Түмэн бэрэстээтэлэ, техника билимин хандьыдаата, Нам уонна Өлөөн улуустарын Ытык киһитэ.

Өлбүттэр

• 1920 — Александр Колчак — Арассыыйа бэлиитикэтин XX-с үйэ саҕаланыытын аатырбыт диэйэтэлэ, Кырасдааныскай сэрии кэмигэр үрүҥнэр басханнара, нуучча байыаннай флотун адьымыраала, гидрограф-учуонай.