Хотугулуу-илиҥҥи федеральнай университекка төрөөбүт тыл уонна сурук-бичик декадата саҕаланна. 30 тэрээһин ыытыллар диэн былаан баар, ол иһигэр университет иһинээҕи уонна өрөспүүбүлүкэтээҕи дьыктаан суруйуута. Хотугу филология кафедратын устудьуоннарыгар эбэҥки тылыгар тотальнай дьыктаан ыытыллыыта интэриэһинэй буолуоҕа, суруйда үрдүк үөрэх кыһатын пресс-сулууспата.
Декада олунньу 4 күнүгэр саҕаланна, итиэннэ олунньу 15 күнүгэр диэри салҕанан барыаҕа. Тэрийээччилэр сылын аайы устудьуоннарга анаан олимпиадалары, квест-оонньуулары, ааҕыыга куонкурустары тэрийэллэр, саҥа хайысхалары киллэрэллэр. Быйыл төрөөбүт тылы үөрэтиигэ, сайыннарыыга, харыстааһыҥҥа үлэлиир эдэр блогердары кытта көрсүһүү тэриллиэҕэ, «Тыл оонньуута» куонкурус буолуоҕа.
«Таатта улууһугар киэҥ ыҥырыылаах пуорум буолара былааннанар. Өксөкүлээх Өлөксөй 125 сылыгар ананар», – диэтэ тэрийээччи, саха тылын кафедратын сэбиэдиссэйэ Дария Чиркоева.
Олунньу 15 күнүгэр ХИФУ Национальнай бибилэтиэкэни кытта «Сахалыы дьыктаан» өрөспүүбүлүкэтээҕи аахсыйаны ыытар.
This post was published on 05.02.2025 10:03 10:03