17 Тохсунньу 17.01
  • -48°
  • $ 73,82
  • 83,32

Олорор дьиэ: Атыылаһыыга, атыылаһыҥҥа балаһыанньа хайдаҕый?

15:26, 18 июля 2016

Саҥа тутулла турар дьиэлэр атыыланалларын туһунан иһитиннэрии, биллэрии ханна да тиий, хал буолуохха диэри хатыланар. Дьон олорор дьиэни атыылаһарга үбэ-харчыта, дохуота дуона суоҕун туһунан баар чахчыны хамсаабыт баайынан анаан дьарыктанар экспердэр этэллэр.


Холобур, Россия парламенын хаһыата суруйарынан, кэлиҥҥи сылларга Россияҕа дьиэ сыаната 10 бырыһыаҥҥа тиийэ аччаабыт. Сыана төһө да намтаатар, ону атыылаһар кыахтаах дьон ахсаана эбиллибэтэх. Эмиэ кинилэр этэллэринэн, ити регионнарга хамнас таһыма үрдээбэккэ турарыттан быһаччы тутулуктаммыт.

Госдума олорор дьиэ бэлиитикэтигэр уонна дьиэ-уот, коммунальнай хаһаайыстыбаҕа кэмитиэтин салайааччытын бастакы солбуйааччы Елена Николаева санаатын киин бэчээт тиэдэр. Ол курдук, мантан салгыы дьиэ сыаната чэпчиирин сабаҕалыыры сөбө суоҕунан кини ааҕар. Элитнэй дьиэлэри дьон кэлин атыыласпат буолбутун иһин,  экономкылаастаах дьиэлэргэ төттөрүтүн атыылаһааччы эбиллибитин кини чиҥэтэн этэр эбит. Онон, быһыы-майгы биир үксүн дьиэ хайдаҕыттан, ханнаа баарыттан, о.д.а. төрүөттэнэр.

Саҥа дьиэни атыылаһыы, онуоха кредиккэ киирии киһи төһө үптээҕиттэн-харчылааҕыттан тутулуктанара биллэр. Оттон ырытар, ыараҥнатар дьон чуолкайдааһыннарынан, кэлиҥҥи балтараа сылга нэһилиэнньэ үбэ-харчыта кыччыы турар. Оттон тутар тэрилтэлэргэ атыылаһааччы суоҕуттан сылтаан үлэһити сарбыйарга, улахан бырайыактары тохтоторго күһэллэллэр.

Россияҕа тутуу салаата чэпчэкитэ суох кэмҥэ бүгүн кэлэн турар. Тутуу матыраалын оҥоруу 20-30 бырыһыаҥҥа диэри кыччаабыт. Маннык судургута суох усулуобуйаҕа дьиэ тутуллара аччыыра көстөн турар чахчы.

Бу эйгэни муоһалыы сылдьар дьон этэригэр сигэннэххэ, судаарыстыба ипотека бырыһыан сороҕун уйунан, дьоҥҥо-сэргэҕэ көмөлөспүтүн да иһин, дьон дьиэлэнэригэр-уоттанарыгар, тутуу тэрилтэтин өйөөһүҥҥэ улахан, биллэр хамсааһын тахсыбатах.

РФ уопсастыбаннай балаататын бэрэстэбиитэлэ ипотека сыллааҕы бырыһыанын 7,5 бырыһыаҥҥа диэри кыччатары туруорсар. Кини ааҕыытынан, оччотугар 4 мөлүйүөн киһи саҥа дьиэни атыылаһыах этэ. Бырыһыан итинтэн өссө ордук кыччаатаҕына, тутуу, олорор дьиэни атыылаһыыга, атыылааһыҥҥа күүстээх хамсааһын тахсыах этэ. Онон, ипотека механизма уларыйыахтааҕар кэм-кэрдии уолдьаспыта бу таһаарыыга суруллар.

Бюджеттан быһаччы тутулуктанар судаарыстыба өйөбүлэ төһө өр салҕанан барыа биллибэт. Ону ким да мэктиэлээбэт.

Бу бүтүн Россиятааҕа тыҥаан турар балаһыанньа. Оттон Саха сиригэр дьиэни атыылаһыыга, атыылааһыҥҥа быһыы-майгы хайдаҕын кэлэр таһаарыыларга билиһиннэриэхпит.

0
0
17 января 17.01
  • -48°
  • $ 73,82
  • 83,32