Саамай биһирэбиллээх 2400 миэтирэлээх дистанцияҕа быйыл Амма улууһун олохтооҕо Анатолий Баишев баайбыт ата Гольфстрим Ван кыайыылааҕынан таҕыста. Кыайыылаах 1,2 мөл. солк. ылла. Иккис миэстэҕэ Сунтаар сүүрүк ата Байсар Барс таҕыста – 800 тыһ., үһүскэ Үөһээ Бүлүү ата Квит — 600 тыһ. солк. ылла диэн иһитиннэрэр СӨ Ил Дарханын уонна Бырабыыталыстыбатын пресс-сулууспата.
“Олоҥхо Ыһыаҕар күүтүүлээх-кэтэһиилээх ат сүүрдүүтэ түмүктэммитинэн эҕэрдэлиибин. Лээги Куубага инникитин да билиниини ылан, сүүрүк аттары кыайыыга кынаттыы турдун”, — диэтэ Ил Дархан.
Быйыл үгэс буолбут ат сүүрдүүтэ, 1969 с. холкуостар бөдөҥсүйүүлэринэн Лээги олохтоохторо Амма, Хаҥалас улуустарын араас нэһилиэктэринэн көспүттэрэ 55 сылыгар анаан ыытылынна, бириис пуондата 3 мөл. солк.
Ону таһынан быйылгы Олоҥхо Ыһыаҕар атынан сүүрдэн иһэн оҕунан ытарга күрэхтэһии аан бастаан ыытылынна. Манна “Импульс” аттаах-спортивнай кулууп иитиллээччилэрэ кытыннылар. Бу күрэхтэһии 90 м усталаах, 2-4 м кэтиттээх анал суолга буолла, онно 45 х 100 см кээмэйдээх 3 төгүрүк сыалы туруорбуттар. Сүрүн усулуобуйа – ытааччы атынан сүүрдэн иһэн, сыаллары табыахтаах.
“Маннык күрэхтэһиилэр түүр-монгол норуоттарга бааллар. Бүгүн ону биһиэхэ Айна Иванова, Нелли Жеребцова уонна Ярослав Некортович көрдөрдүлэр. Күрэхтэһии саҥа көрүҥэ буолан, олус долгуйдаллар да, оҕолор бэркэ көрдөрдүлэр. Инникитин успуорт бу көрүҥүн ыһыах спортивнай тэрээһиннэригэр киллэриэхпит, онно улахан дьон кыттыахтара”, — диэн кэпсээтэ успуорт маастара, оҕунан ытыыга күрэхтэһии салайааччыта Петр Неустроев.
Источник: Саха сирэ саайт
This post was published on 21.06.2024 15:28 15:28