Бырабыыталыстыба бэрэстээтэлин солбуйааччы Сергей Местников Кэбээйи сэлиэнньэтигэр Олоҥхо ыһыаҕар бэлэмнэнии тэрийэр кэмитиэтин көһө сылдьар мунньаҕын ыытта. Национальнай бырааһынньык аан бастаан Кэбээйи улууһугар ыытыллыаҕа уонна өрөспүүбүлүкэҕэ Олоҥхо үһүс уон сылын арыйыаҕа. Ол туһунан www.sakha.gov.ru сайт иһитиннэрэр.
«Кэбээйи улууһа бэйэтин култууратынан, кэрэ айылҕатынан баай. Манна хоту дойду төрүт омуктарын бэрэстэбиитэллэрэ — эбээннэр — бэйэлэрин култуураларын, үгэстэрин, төрөөбүт тылларын харыстабыллаахтык тутан олороллор. Мин соторутааҕыта Сэбээн Күөл дэриэбинэҕэ сылдьыбытым, оскуола саастаах оҕолор, улахан дьон эбээн тылынан бэйэ-бэйэлэрин кытта алтыһаллар. Саха норуотун култуурата да, эбээн култуурата да Олоҥхо ыһыаҕын түһүлгэтигэр билиһиннэриллиэ диэн эрэнэбин», — диэтэ салайаааччы.
Сиэри-туому, сүрүн тэрээһиннэри, куоҥкурустары уонна спортивнай күрэхтэһиилэри ыытарга 15 эбийиэк тутуллуоҕа. Билигин тутуу матырыйаалын бэлэмнээһин үлэтэ түмүктэнэн, Кэбээйи сэлиэнньэтигэр тиэрдилиннэ. Матырыйааллар сүрүн өттүлэрэ атыылаһылынна. Билигин тимир каркаска анаан матырыйааллары тиэрдии ыытыллар. Эбийиэктэр уус-уран элеменнэрин бэлэмнээһиҥҥэ үлэ салҕанар.
Сотору кэминэн тимир конструкциялар сүһүөхтэрин барытын туруоруохтара. Сэргэ уонна “Күн күөрдэм” эбийиэк остуолбаларын таҥыы үлэлэрэ ыытыллыахтара, киин трибуна тимир конструкцияларын оҥоруохтара.
Мунньахха ыһыах чэрчитинэн ыытыллар өрөспүүбүлүкэтээҕи куоҥкурустар уонна спортивнай күрэхтэһиилэр балаһыанньаларын бигэргэттилэр.
Бырааһынньык концепцията Олоҥхо институтун уонна Саха сирин аҕыйах ахсааннаах норуоттарын гуманитарнай чинчийиилэрин уонна кыһалҕаларын институтун кытта бииргэ оҥоһулунна.
Бу күннэргэ Кэбээйи улууһугар Олоҥхо ыһыаҕын ыытыы научнай уонна концептуальнай төрүттэрин дьүүллэһэр научнай-методическай конференция олохтоох сэлиэнньэҕэ буолан ааста. Конференция түмүгүнэн тэрийэр кэмитиэт концепцияҕа этиилэри киллэрэр.
«Научнай-практическай конференция кыттыылаахтарын таһыма сыл аайы үрдээн иһэр. Быйыл култуура, үөрэх эйгэтин үлэһиттэрэ 19 улуустан, ол иһигэр хотугу, промышленнай оройуоннартан, холобур, Ленскэй оройуонтан кэлбиттэр», — диэн бэлиэтээтэ Сергей Местников.
Ыһыах аһыллыытын уонна сабыллыытын сиэригэр-туомугар 1,5 тыһыынча кэриҥэ киһи кыттара күүтүллэр, ол иһигэр Нам, Горнай, Үөһээ Бүлүү уонна Бүлүү улуустарыттан судаарыстыбаннай тыйаатырдар уонна култуура тэрилтэлэрин кэлэктииптэрэ. Тэрээһиннэри ыытыыга 120 волонтер кыттыаҕа.
Солбуйааччы эппиэттээх биэдэмистибэлэргэ, хамыыһыйаларга кыттааччылары хонноруу, аһатыы, куттал суох буолуутун хааччыйыы, тохтоло суох сибээс, медицинскэй хааччыйыы боппуруостарын быһаарыыга ураты болҕомтону уурарга сорудахтаата.
Маны сэргэ сотору кэминэн тэрээһин-техническэй дьаһаллар былааннарын толорууну хонтуруоллуур оперативнай бөлөҕү тэрийэргэ сорудахтанна.
Ыһыах национальнай бырааһынньыга от ыйын 4-5 күннэригэр Кэбээйи сэлиэнньэтин «Уһун Хонуу» диэн сиргэ буолар.
Ил Дархан Айсен Николаев Олоҥхо күнүгэр, 2025 сыл сэтинньи 25 күнүгэр, олоҥхоҕо, оһуохайга, тимир уустарга уонна норуот маастардарыгар истипимэндийэлэри туттарыы сиэригэр-туомугар Олоҥхо үһүс уон сылын Саха сиригэр ыытар туһунан дьаһалга илии баттаабыта. Кини бу сыллар усталарыгар Олоҥхону харыстааһыҥҥа уонна тарҕатыыга, үөрэхтээһиҥҥэ, култуураҕа, интернет ситимигэр бырайыактары олоххо киллэриигэ, кинигэлэри таһаарыыга улахан үлэ ыытыллыбытын тоһоҕолоон бэлиэтээбитэ.
Санатан эттэххэ, 2026 сыл Арассыыйаҕа норуоттар сомоҕолоһууларын сылынан уонна Саха сиригэр култуура сылынан биллэриллибитэ.
