Амма улууһугар Олоҥхо ыһыаҕа саҕаланна. Бэҕэһээ киэһэ олоҥхоһуттар куонкурустарын бастакы күнэ буолбута. Күнүстэри, түүннэри үс күн өрөспүүбүлүкэ бастыҥтан бастыҥ олоҥхоһуттара мустан күөн көрсүөхтэрэ.
Олоҥхо ассоциациятын президенэ Феврония Шишигина эппитинэн, сылын аайы олоҥхоһут ахсаана эбиллэн иһэр. Ол иһин үс күн ыытыллар. Бастакы күн киэһэ 9 чаастан сарсыарда күн ойуор диэри олоҥхолуохтара. Сааһынан арахсыы баар: оҕо, ыччат, улахан киһи уонна бөлөҕүнэн толоруу.
«Быйыл ыччакка элбэх сайаапка киирдэ. Бүтэһик сылларга элбэх эдэр киһи олоҥхолуур буолла. 5 — 7 чаас устата толороллор. Эдэр учууталлар оҕолору үөрэтиилэрэ элбээтэ. Ити аата биһиги норуоппут искусствота көхтөөхтүк сайдар», — диэтэ Феврония Шишигина.
Бастыҥнар сертификат тутуохтара, харчынан бириэмийэ ылыахтара.
Улахан дьоҥҥо гран-при 700 тыһ солк тутуоҕа, ыччакка — 300 тыһ солк, оҕолорго — 100 тыһ солк.
