СӨ Бырабыыталыстыбатын бэрэссэдээтэлин бастакы солбуйааччы Дмитрий Садовников Орто Халыма улууһугар оробуочай сырыытын кэмигэр 2029 сылга ыытыллыахтаах Олоҥхо Ыһыаҕар бэлэмнэнии туһунан мунньаҕы ыытта, суруйда Саха сирэ саайт.
Бу үс Халыма улуустарын үгэстэрин уонна култуурунай нэһилиэстибэлэрин түмэр улахан култуурунай тэрээһин буолара күүтүллэр.
Бэлэмнэнии былаанынан, 2027 сыл сааһыгар тэрийэр хамыыһыйа тэриллиэхтээх, састааба Айсен Николаевка бигэргэтиигэ киириэхтээх. Ол кэнниттэн, тэрийэр хамыыһыйа тэрээһин уонна техническэй дьаһаллар кэлим былааннарын оҥорууну, үлэлиир хамыыһыйалары тэрийиини, бэстибээл былаанын уонна ороскуотун симиэтэтин бэлэмнээһини, бигэргэтиини саҕалыаҕа.
СӨ култуураҕа уонна духуобунай сайдыыга министиэристибэтэ Орто Халыма улууһун бэрэстэбиитэллэрин кытта үс оробуочай көрсүһүүнү ыытта. 2029 сыллааҕы Олоҥхо ыһыаҕын кэнсиэпсийэтин оҥорууга эмиэ үлэ барар.
Дмитрий Садовников үгэс быһыытынан, Халыма улуустарын олохтоохторо түмсүүлээхтэринэн, улахан суолталаах кыһалҕалары быһаарарга сомоҕолоһор кыахтаахтарынан уратыларын бэлиэтээтэ.
«Биһиги Халымабыт сомоҕолоһуунан, доҕордоһуунан уонна аһаҕас буолуунан уратылаах. Мин бу улуустан төрүттээхпиттэн, сибээстээхпинэн өрүү киэн туттабын. Олонхо ыһыаҕар бэлэмнэнии улуустар сайдыыларыгар улахан төһүү буолар — инфраструктураны саҥардыы, уопсастыбаннай сирдэри тупсарыы, социальнай эбийиэктэри тутар уонна олохтоохторго саҥа кыахтары үөскэтэр. Улуус бу ыһыаҕы Халыма бастыҥ үгэстэрин, баай култуурунай нэһилиэстибэтин уонна аныгы ньымалары холбоон, үрдүк таһымнаахтык тэрийиэҕэр бигэ эрэллээхпин», — диэн тоһоҕолоон бэлиэтээтэ.
Бэлэмнэнии чэрчитинэн, култуурунай эйгэни сайыннарыыга уонна олохтоохтору кытыннарыыга туһуламмыт хас да дьаһал ыытылла турар. Холобур, 2026 сыл кулун тутар 12 күнүттэн Орто Халыма улууһугар Халыма Арктикатын норуоттарын национальнай култуураларын «Большая медведица-2026» бэстибээлэ ыытыллыаҕа. Бэстибээл Олоҥхо ыһыаҕар саҕалыыр былаһаака уонна Арктика улуустарыгар култуурунай көҕүлээһиннэри бөҕөргөтүүгэ улахан суолталаах түһүмэх быһыытынан көрүллэр.
Сиһилии: https://www.sakha.gov.ru/news/39848
This post was published on 17.03.2026 13:03 13:03