Быйыл Олоҥхо ыһыаҕа от ыйын 3-5 күннэригэр Кэбээйи улууһун Кэбээйи сэлиэнньэтигэр ыытыллыаҕа. Республиканскай суолталаах тэрээһин оройуоҥҥа кини устуоруйатыгар бастакынан ыытыллар.
Кэбээйи оройуонун дьаһалтатын култуура управлениетын начальнига Илья Алексеев ЯСИЯ-ҕа сайыҥҥы сүрүн национальнай бырааһынньыгар бэлэмнэнии хайдах ааһарын кэпсээтэ.
«Кэбээйи сэлиэнньэтэ — биһиги оройуоммут историческай киинэ. Сэлиэнньэ өрөспүүбүлүкэ киинин кытта сылы быһа сиринэн сибээстээх. Бырааһынньыкка бэлэмнэнии чэрчитинэн соторутааҕыта «Ысыах Олонхо в Кобяйском улусе: хранители традиции, озерная культура, творческие индустрии» диэн научнай-методическай конференцияны ыыттыбыт. Онно икки тыһыынча кэриҥэ киһи кыттыбыта, ол иһигэр регионтан 115 эксперт уонна лектор.
Ыһыах иннинэ Кэбээйи сэлиэнньэтигэр 17 регламентнай эбийиэк үлэҕэ киириэҕэ, ол иһигэр, түһүлгэ, сценалаах киин трибуна уонна ытык Аал Луук Мас. Ону таһынан 20-чэ регламентнайа суох эбийиэк көрүллэр. Холобур, ат спордун сайыннарарга ипподром уонна оҕо оонньуур былаһаакката», — диэтэ Илья Алексеев.
Кини Кэбээйи сиригэр Олоҥхо ыһыаҕа Саха сирин бары олохтоохторун түмэн үрдүк таһымҥа ааһарыгар эрэллээҕин биллэрдэ.
