Субуотаҕа, балаҕан ыйын 6 күнүгэр, Олоҥхо тыйаатыра режиссер Лена Оленова туруоруутугар 18-с сезонун «Орфей уонна Эвридика» испэктээҕинэн арыйда, диэн ЯСИА иһитиннэрэр.
Олоҥхо-перфоманс таҥара музыкана Орфей уонна кини тапталлааҕа Эвридика тустарынанн былыргы грек мифтэригэр олоҕурар. Бу режиссер Лена Оленова дебют үлэтэ. Перфоманс-олоҥхо премьерата Дьокуускайга быйыл кулун тутарга буолбута.
Режиссер бэлиэтээбитинэн, сезону арыйарга чуолаан бу айымньыны талыы мээнэҕэ буолбатах. Испэктээк былыргы грек мифин саха героическай эпоһын Олоҥхону кытта холбоон саҥа уонна сибиэһэй ааҕыы буолар. Туруоруу идеята Оленоваҕа Санкт-Петербурга үөрэнэ сырыттаҕына үөскээн, Всеволод Мейерхольд үлэтигэр интэриэһин кытта сибээстээх.
«Орфей дьылҕа-хаанын утары баран, тапталлааҕын быыһыан баҕарарын туһунан историята миэхэ интэриэһи үөскэппитэ. Бу биһиги олоҥхоһуппут эбит дии санаабытым. Эпос мифологияттан үөскээбит буолан, икки мифологияны ситимнээһин идеята олус үчүгэйдик сытар», — диэн кэпсээтэ Лена Оленова.
Хоһоонунан пьесаны Ангелла Попова (Кыраман) суруйбут. Хореографията балетмейстер Екатерина Тайшина, оттон көстүүмнэргэ Сардаана Федотова эппиэттиир.
Тыйаатыр кэлэр премьераҕа бэлэмнэнэрэ этилиннэ. Бу Лена Оленова уонна Екатерина Тайшина аан дойду классикатыгар өссө биир холбоһуктаах үлэлэрэ буолуоҕа. Айымньылар тиэкистэригэр актриса Анастасия Алексеева үлэлиир.
This post was published on 08.09.2025 10:20 10:20