«Буойун Суола» бүтүн Россиятааҕы байыаннай-тактическай күрэхтэһии финал түһүмэҕин тэрийэр мунньаҕы Саха сирин бырабыыталыстыбатын бэрэссэдээтэлин солбуйааччы Ольга Балабкина ыытта. Кини тэрээһин ураты болҕомто киинигэр баарын тоһоҕолоон бэлиэтээтэ, диэн иһитиннэрдэ sakha.gov.ru.
«Саха сиригэр бастакы бүтүн Россиятааҕы байыаннай-тактическай күрэхтэһии финалын ылыы улахан чиэс. Биһиги саамай үрдүк таһымнаах тэрийиини хааччыйыахтаахпыт», — диэн бэлиэтээтэ салайааччы.
Мунньахха тэрээһин-техническай аспекттарын, култуурунай бырагырааманы, куттал суох буолуутун хааччыйыыны, күрэхтэһии кыттааччыларын олордор сир уона аһатыы боппуроустарын көрдүлэр. “Буойун суола” ойуур зонатыгар тэриллиэҕэ, хамаандалар олорор “Энергетик» оҕо сынньалаҥ лааҕырдарыттан чугас.
«Буойун Суола» финал түһүмэҕэ Дьокуускайга балаҕан ыйын 15-21 күннэригэр ыытыллыаҕа. Күрэхтэһиигэ Россия түөрт регионуттан — Саха Сириттэн, Хабаровскай кыраайтан, Волгоград уонна Тюмень уобаластарыттан 48 спортсмен кыттыаҕа. Кинилэр сүүмэрдиир боруобалары аастылар уонна бэлэмнээһин үрдүк таһымын дакаастаатылар.
Тэрийээччилэр балаҕан ыйын 12 күнүгэр бырагыраама сүрүн элеменнэрин ырытан оҥорор генеральнай репетиция буоларын иһитиннэрдилэр. Спортивнай тургутуулартан ураты кыттааччылары уонна ыалдьыттары патриотическай сыаннастары уонна хамаанда тыынын бөҕөргөтүүгэ туһуламмыт баай культурнай бырагыраама күүтэр.
Тэрээһини РФ бырабыыталыстыбатын бэрэссэдээтэлин солбуйааччы — президент УИ-ҥҥэ боломуочуйалаах бэрэстэбиитэлэ, «БУОЙУН» киин кэтээн көрөр сэбиэтин бэрэссэдээтэлэ Юрий Трутнев өйөөһүнүнэн «БУОЙУН» киин тэрийэр. Бырайыак дойду үрдүнэн киин филиалларыгар үөрэнэр курсаннар үөрүйэхтэрин бэлэмниир уонна бэрэбиэркэлиир биир сүрүн былаһааккаҕа кубулуйда.
This post was published on 11.09.2025 14:33 14:33