Бүгүн, от ыйын 11 күнүгэр, СӨ Бырабыыталыстыбатын бэрэссэдээтэлин солбуйааччы Ольга Балабкина суһал мунньахха ыччат дьыалаларыгар уонна социальнай коммуникацияҕа миниистирин саҥа солбуйааччытын Александр Максимовы билиһиннэрдэ, диэн НВК Саха телеграм-ханаала суруйар.
«Александр Григорьевич «Якутия — Земля героев» каадырабай бырайыак кыттыылааҕа буолар. Бу бырайыагы Ил Дархан Айсен Николаев көҕүлээбитэ. Онон Александр сыалы-соругу хайдах ситиһэри сатыыр, эндэппэккэ билэр. Кини олоҕун, үлэлээбит уонна бойобуой уопута судаарыстыбаннай ыччат бэлиитикэтин, патриот быһыытынан иитиини олоххо киллэрэргэ уонна гражданскай уопсастыба институттарын кытта бииргэ үлэлэһэргэ туһалыаҕа», – диэн СӨ Бырабыыталыстыбатын бэрэссэдээтэлин солбуйааччыта эттэ.
