16 От ыйа 16.07
  • 22°
  • $ 87,81
  • 95,78

Окко тэрээһиннээх үлэ эрэйиллэр

15:52, 10 августа 2016
Текст:
Читайте нас на
Яндекс Новости
ЯДВ

Нам улууһугар быйыл от үүнүүтэ быстар мөлтөх буолла. Эбиитин от уута кэлэн үрэхтэргэ, салааларга толору уу киллэрэн отчуттарга улахан харгыстары таһаарда. Ол эрэн, олорон хаалбакка, сүөһүлэрин, сылгыларын кыстатар отторун булунаары дьон-сэргэ араас ньыманы тобулан оттуур.


Ааспыт нэдиэлэҕэ уу биллэрдик эбиллэн Нам улууһун сиригэр-уотугар атырдьах ыйын 2 күнүгэр ыксаллаах быһыыны-майгыны биллэрдилэр. Уопсайа 755 гектар оттонор сир, ону таһынан 185 тонна кыстыкка бэлэмнэммит от ууга барда. Манан сиэттэрэн нэһилиэктэртэн мобильнай биригээдэлэр тэриллэн оттоотохторуна эрэ кыстыыр оту булунар кыахтаахпыт. Онон “Нам улууһа” МТ баһылыга Александр Атласов, баһылыгы тыа хаһаайыстыбатыгар уонна предпринимательствоҕа солбуйааччы Ефим Гоголев “Хамаҕатта нэһилиэгэ” МТ баһылыга Иван Максимов, “Никольскай нэһилиэк” МТ баһылыга Руслан Ипполитов, “Хатыҥ Арыы нэһилиэгэ” МТ депутаттарын Сэбиэтин председателэ Евгений Жирков, Түбэттэн “Кулаада” бааһынай хаһаайыстыба салайааччыта Радик Лукин Кэбээйи улууһун Сииттэ нэһилиэгэр баран оттуур сир көрдүлэр, нэһилиэк урбаанньыттарын, бааһынай хаһаайыстыбалар салайааччыларын, улуус уонна нэһилиэк дьаһалтарын үлэһиттэрин кытта көрүстүлэр. Кэпсэтии түмүгүнэн Энгельс, Лаабыча уонна Олой диэн сирдэри оттуоххутун сөп диэн Сииттэ баһылыга Галина Лебедева уонна специалистара, «Кэбээйи улууһа» МТ баһылыгын бастакы солбуйааччы Степан Павлов, Кэбээйитээҕи ветеринария управлениетын начальнига Николай Соловьев, Кэбээйитээҕи ТХУ начальнига Айсен Татаринов уо.д.а. специалистар биир санааҕа кэллилэр. Ону таһынан Сииттэлэр быйылгы оту тоннатын 4 тыһ. солк., онтон кур оту 2 тыһ. солк. атыылыахпытын сөп диэтилэр.

Онон улууспут нэһилиэктэриттэн мобильнай биригээдэлэр тэриллэннэр ити ааттаммыт сирдэргэ баран оттуохтарын сөп. Билигин биллэринэн Хамаҕатта нэһилиэгэ мобильнай биригээдэ тэринэн Сииттэҕэ оттуу бараары тэринэ сылдьар. Ону сэргэ Модут нэһилиэгин биригээдэтэ ыраах алаастарыгар тахсан отун бэлэмнэнэр, өссө эбии иккис биригээдэни атын алааска ыытарга бэлэм. Хатыҥ Арыы уонна Таастаах нэһилиэгэ биригээдэ тэринэр.

Сүөһү аһылыгын бэлэмнииргэ ылыллыбыт былааны толорууга республика правительствота тэрээһин миэрэлэри ылан уматыкка 3 мөл. солк. үп көрүлүннэ. Ону таһынан улуустары тууһунан хааччыйар туһунан быһаарыы ылыллан Сунтаар Кэмпэндээйитин тууһунан хааччыйдылар. Онон туус бэлэмнэммит оту харайарга туттуллуоҕа.

Следите за самым важным и интересным в Telegram-канале и WhatsApp-группе ЯСИА