15 От ыйа 15.07
  • 21°
  • $ 87,74
  • 95,76

Ойуурбут баһаарга былдьанан эрэр

11:11, 09 июля 2018
Текст:
Читайте нас на
Яндекс Новости
ЯДВ

Сайын буолла да, ойуур баһаарын айдаана тахсар. Онуоха быйыл сир-дойду бүтүннүү кууран, хас да сыллаах сэтиэнэх от мунньуллан, дойдубут буорахтаах буочука курдук буолла. Оттон буруо киһи доруобуйатыгар улахан буортулаах. Дьокуускай олохтоохторо бу сарсыарда буруонан тыынан уһугуннулар. 


Саха сиригэр бүгүҥҥү күҥҥэ уопсайа 17 ойуур баһаара баар. Ол курдук, Үөһээ Бүлүүгэ 2500 га, Бүлүүгэ 4470 га, Горнайга 1090 га, Кэбээйигэ 90 га, Ленскэйгэ 74 га, Мэҥэ Хаҥаласка 95 га, Намҥа 2323 га, Ньурбаҕа 595 га , Өлүөхүмэҕэ 150 га уонна Сунтаарга 3673 га сир уокка былдьанан турар.

Нам улууһун Түбэ нэһилиэгин олохтоохторо этэллэринэн, баһаар тыалтан күөдьүйэн,  дэриэбинэ диэки чугаһаан иһэр. Олохтоох эр дьон бары баһаары умулларыыга үлэлии сылдьаллар. Хас күн аайы бөртөлүөт, сөмөлүөт кэлэн уу кутар да, уот кыайтарар санаата суох дииллэр. Сахабыт сирин биир бултаах-алтаах Үрүҥ-Күөл диэн  сирэ, ото-маһа, кыыла-сүөлэ уокка былдьанан эрэр диэн олохтоохтор айманаллар.

Манна даҕатан эттэххэ, бу күннэргэ интэриниэт ситимнэригэр умайан өлбүт кыыллар, уоту кытта охсуһа сылдьар дьоннор хаартыскалара киэҥник тарҕанна.

От ыйын 4 күнүттэн, Хабаровскайтан кэлэр БЕ-200 сөмөлүөт 500 тонна ууну Саха сирин баһаардарыгар куппут. Бүгүҥҥүттэн МИ-8 баһаардарга уу кутан саҕалыаҕа. Маны таһынан, Саха сирин ойуурун хаһаайыстыбатын департамена «Авиалесоохрана» Федеральнай салалтатыгар АН-26 сөмөлүөт көмөтүнэн ардахтаах былыттары үүрэн аҕалар туһунан сайаапка түһэрдэ.

Буорах курдук умайбыт баһаардарбытын умулларарга өссө элбэх күүс наада. Аҥардас олохтоох дьон кыайбаттара чахчы. Сыл аайы үөскүүр кыһалҕа быһаарылларыгар да уолдьаста.

От ыйын 6 күнүттэн, Саха сирин ойуурдарыгар суһал балаһыанньа биллэрилиннэ.

Буруо тунуйбут сирдэригэр олорор дьон таһырдьа сылдьаргытын аччатаргыт, бэйэҕитин кытта маарыла, тыҥаны харыстыыр анал мааска илдьэ сылдьаргыт ордук буолуо.

Николай ПОПОВ, «Саха сирэ» хаһыат, edersaas.ru

Следите за самым важным и интересным в Telegram-канале и WhatsApp-группе ЯСИА