Былырыын Иркутскайга «Боярышник» настойканы иһэн 40-тан тахса киһи сүһүрэн өлөн, испиир булкаһыктаах бородууксуйа атыытын хонтуруолга ылар туһунан РФ премьер-миниистирэ Дмитрий Медведев туһааннаах уорганнарга сорудахтаабыта. Биһиги өрөспүүбүлүкэбитигэр бобуулаах бородууксуйалары атыылааһыны бохсорго туһуламмыт бэрэбиэркэ үлэтэ хайдах барбытын туһунан edersaas.ru ааҕыҥ.
Киһи уйгутун уонна атыылаһааччы быраабын көмүскүүр федеральнай надзор сулууспатын СӨ управлениетын иниспиэктэрдэрэ «О проведении внеплановых проверок производства и оборота спиртосодержащей продукции» ыйаахха олоҕуран, ааспыт сыл ахсынньы 1 күнүттэн саҕалаан 2017 сыл тохсунньу 23 күнүгэр диэри өрөспүүбүлүкэ үрдүнэн 762 бэрэбиэркэни ыыттылар.
Бэрэбиэркэ түмүгүнэн, уопсайа 214,2 лиитирэ кээмэйдээх 47 партия (2179 устуука) испиир булкаһыктаах бородууксуйа атыыттан тохтотулунна.
Оттон тохсунньу 16 – 23 күннэригэр Бүлүү, Үөһээ Бүлүү, Сунтаар, Нерюнгри, Чурапчы улуустарыгар, уопсайа, 5,2 лиитирэлээх 57 устуука лосьон «хомулунна». Россия үрдүнэн бобуллубут бородууксуйаларынан эргинэр урбаанньыттарга административнай быраабы кэһиигэ боротокуол оҥоһулунна. Биэс урбаанньыт 15000 солк. суумалаах ыстараапка уурулунна.
25%-наах «Витасепт», «Боярышник», «Хлебный», «На бруньках», «Розовая вода», «Огуречный» косметическэй лосьоннар бобулуннулар.
Бобуулаах бородууксуйанан эргинэр маҕаһыыннары билэр буоллаххытына, Киһи уйгутун уонна атыылаһааччы быраабын көмүскүүр федеральнай надзор сулууспатын Саха сиринээҕи управлениетыгар 8800-550-21-24 төлөпүөнүнэн эрийэн биллэриҥ.
