Бу нэдиэлэҕэ Ил Түмэн бүддьүөккэ, үпкэ-харчыга, нолуокка уонна сыана бэлиитикэтигэр, бас билии уонна приватизация боппуруостарыгар сис кэмитиэт мунньаҕар ОДьКХ салаатыгар үп-харчы тиийбэтин хайдах, хантан булуохха сөбүн туһунан ырытыстылар. Мунньаҕы сис кэмитиэт бэрэссэдээтэлэ, Ил Түмэн вице-спикерэ Юрий Николаев ыытта.
СӨ Дьиэҕэ-уокка, хомунаалынай хаһаайыстыбаҕа уонна энергетикаҕа миниистир э.т. Наталия Готовцева иһитиннэрбитинэн, хомунаалынай хаһаайыстыба тэрилтэлэрэ 2025 с. 61 321 мөл. солк. суумалаах субсидияҕа наадыйаллар, оттон бүддьүөккэ 34 227 мөл. солк. көрүллүбүт, онтон 17 518 мөл. солк. былырыын оҥоһуллубут хомунаалынай өҥөҕө, 14 133 мөл. солк. 2024 с. субсидия дэписиитин сабарга туттуллуохтаах.
Кини бу салааҕа үп-харчы тиийбэтэ дьиэни-уоту сылааһынан, уунан хааччыйыы уустугурарыгар тиэрдэр кутталлааҕын этэн туран кэлэр ыйга бүддьүөккэ киирэр уларытыыларга 27 млрд. солк. буларга этии киллэрдэ.
Иван Данилов ону истэн баран эһиил өссө элбэх харчыны көрдүөхтэрэ, итинник үлүннэриллибит суумаҕа итэҕэйбэтин туһунан эттэ. Норуот дьокутааттара бүддьүөт дохуота эмиэ бүтэр уһуктааҕынан, остуол анныттан хостоон ылар мөһөөччүктээх харчы суоҕунан сибээстээн, оччотугар атын ороскуоту аччатарга диэн сүбэлэстилэр. Судаарыстыбаннай бырагыраамалар ороскуоттара аччаатаҕына, оскуола, уһуйаан тутуута тохтуон, доруобуйа, үөрэх, онтон да атын салааҕа көрүллэр үп кыччыан сөп.
Дьиэлэргэ ититиини биэрэр сезон бүттэҕинэ сорох тэрилтэлэр моҥкуруут бараллара, үп-харчы төлөммөккө «РусГидро» Алдантан барарын туһунан биллэрбитин иһитиннэрдилэр. Онон эһиилги кыһыны хайдах туоруурбут биллибэт диэн сэрэттилэр, суруйда Марианна Тыртыкова, Саха Парламент саайт.
Василий Кононов хаартыскаҕа түһэриитэ.
This post was published on 15.04.2025 10:12 10:12