Атырдьах ыйын 26-30 күннэригэр Дьокуускай к. «Дьиэ кэргэн – биһиги сылаас дьиэбит» оҕону иитэ ылар ыаллар өрөспүүбүлүкэтээҕи IV форумнара буолуоҕа.
Форум үлэтигэр өрөспүүбүлүкэ 17 муниципальнай тэриллиититтэн уонна куорат уокуруктарыттан оҕолору иитэ ылбыт 23 дьиэ кэргэн оҕолорунаан, эпиэкэ уонна попечительство муниципальнай уорганнарын бэрэстэбиитэллэрэ, министиэристибэлэр, тэрилтэлэр салайааччылара уонна исписэлиистэрэ кыттыахтара. Кинилэр тулаайах уонна төрөппүт көрүүтэ-истиитэ суох хаалбыт оҕолору иитэ ылар ыаллар уонна ведомстволар икки ардыларыгар тахсар боппуруостары дьүүллэһэр «төгүрүк остуолларга», семинардарга, трениннэргэ кыттыахтара. Ону сэргэ тулаайах уонна төрөппүт көрүүтэ-истиитэ суох хаалбыт оҕолору олохтооһуҥҥа биэдэмэстибэлэри кытары хардарыта бииргэ үлэлээһин боппуруостарын дьүүллэһиэхтэрэ.
Исписэлиистэргэ семинардар, төрөппүттэр эппиэтинэстэрин тургутан көрөр куонкурустар тэриллиэхтэрэ. Куонкуруска 8 ыал кыттыаҕа. Оҕолор араас хайысхалаах куруһуоктарга дьарыктаныахтара, «Планета Кидс» ыалдьыттыахтара, «Аатыҥ кимий, мин доҕорум?» доҕордоһуу биэчэригэр кыттыахтара, «Азия оҕолоро» спорт норуоттар икки ардыларынааҕы оонньууларын чемпионнарын уонна призердарын кытары көрсөр үрдүк чиэскэ тиксиэхтэрэ. Төрөппүттэр спорт күрэхтэригэр күөн көрсүөхтэрэ.
Форум дьаһаллара Дьокуускайга Сэргэлээх шоссета 12 аадырыска «Сосновай бор» оҕолору сынньатар уонна чэбдигирдэр кииҥҥэ ыытыллыахтара.
Ыспыраапка:
Тулаайах уонна төрөппүт көрүүтэ-истиитэ суох хаалбыт оҕолору дьиэ кэргэҥҥэ иитэ ылар ыал өрөспүүбүлүкэтээҕи форумнарыгар төһө киһи кыттыбытай?
2013 с. I форумҥа – 17 муниципальнай тэриллииттэн уонна куорат уокуруктарыттан 24 ыал, барыта 101 киһи.
2014 с. II форумҥа – 13 муниципальнай тэриллииттэн уонна куорат уокуруктарыттан 18 ыал, барыта 79 киһи.
2015 с. III форумҥа – 15 муниципальнай тэриллииттэн уонна куорат уокуруктарыттан 19 ыал, барыта 65 киһи.
