29 Бэс ыйа 29.06
  • -7°
  • $ 104,68
  • 115,6

Оҕо сайыҥҥы лааҕырдара Роспотребнадзор ирдэбилин тутуһан үлэлиэхтэрэ

17:01, 04 февраля 2021
Текст:

Кэлэр сайын оскуола үөрэнээччитин 75%-нын оҕо сайыҥҥы сынньалаҥ лааҕырынан хабар сорук турар. Барыта 500 лааҕыр үлэлиэ. Бу туһунан бүгүн вице-премьер Сергей Местников ыыппыт мунньаҕар дьүүллэстилэр.


Үөрэх миниистирин солбуйааччы Владимир Тихонов билиҥҥитэ Роспотребнадзор ирдэбилинэн лааҕырдар 50% толору буолуохтаахтарын, оҕо сайыҥҥы сынньалаҥын тэрийиигэ үп тиийбэтин, лааҕырдар баазаларын бөҕөргөтүүгэ алта сыл харчы көрүллүбэтэҕин эттэ.

Физкультура уонна спорт миниистирэ Иннокентий Григорьев бэйэлэрин салааларынан 4150 оҕону дьарыктыыр былааннаахтарын иһитиннэрдэ.

Доруобуйа харыстабылын миниистирин бастакы солбуйааччы Алексей Яковлев оҕолорго доруобуйаларын туруктарын туһунан уопсай ыспыраапка бэриллэр буолуон, өрөспүүбүлүкэ таһыгар барааччылар бырааска көрдөрөн ыспыраапка ылыахтарын эттэ. Кини лааҕырдарга мэдиссиинэ үлэһиттэрэ үлэлиэхтэрэ диэтэ. Роспотребнадзор салайааччытын солбуйааччы Наталья Борисова оҕолортон ПЦР анаалыһа буолбакка көннөрү мэдиссиинискэй ыспыраапка ирдэниэн эттэ.

Сергей Местников үп боппуруоһугар кэлэр нэдиэлэҕэ хаттаан мунньахтыыры, оҕо лааҕырдарын сылынан былааннаан өрөмүөннүүргэ үлэ барылын бэлэмниири соруйда.

Следите за самым важным и интересным в Telegram-канале и WhatsApp-группе ЯСИА
0
0