Бу күннэргэ Саха сирин оҕо саадатарын историятыгар аан бастаан оскуолаҕа киириэн иннинэ саастаах оҕолор ГТО туттардылар.
2014 сыллаахха олоххо киирбит ГТОну туттарыы саҥа ирдэбилинэн оҕо 5 сааһыттан саҕалаан, бастакы ступеннээх ГТО нуорматын туттараллар эбит.
Дьокуускай куорат “Умка” оҕо саадыгар отучча оҕо ГТО нуорматын туттарда.
— Бу оҕо саадыттан саҕалаан оскуолаҕа киириэн иннинэ саастаах оҕолор уһуйааннарыгар барыларыгар ГТО нуорматын тутуохпут. Билигин тымныы буолан, дьиэ иһигэр туттарыллар сиртэн тардыныы, миэстэттэн ойуу уонна сүүрүү көрүҥнэригэр туттубут. Тэрээһини үөрэх министиэристибэтин уонна ГТО-ну туттарыы региональнай киинин кытта бииргэ ыытабыт, — диэн бэлиэтиир Үөрэх министиэристибэтин иһинэн үлэлиир Оҕо уонна ыччат физкультурнай сайдыытын киинин салайааччыта, Ил Түмэн депутата Михаил Габышев.
Онон ГТО нуорматын аны оҕо уһуйааннарын иитиллээччилэрэ туттарар буолуохтара.
Любовь ФЕДОРОВА, СӨ Оҕо уонна ыччат физкультурнай сайдыытын киинин общественноһы кытта үлэҕэ исписэлииһэ.
This post was published on 25.04.2018 18:47 18:47