Ньурбатааҕы инбэлииттэр уопсастыбаларын салаата сэтинньи 22 күнүгэр 30 сыллаах үбүлүөйүн «Кыталык» култуура киинигэр бэлиэтээтэ. Уопсастыба күүстээх санаалаах, инникигэ дьулуурдаах дьонноох буолан, өрөспүүбүлүкэ, улуус, куорат таһымнаах күрэхтэһиилэргэ, улуус уопсастыбаннай олоҕор мэлдьи кыттар, атыттарга үтүө холобур буолар.
Ньурбатааҕы инбэлииттэр уопсастыбалара 30 сыллаах үбүлүөйүн бэлиэтээтэ. Тэрээһин сахалыы алгыһынан арылынна. «Ньурба оройуон» МО дьаһалтатын баһылыга Алексей Михайлович Иннокентьев, «Ньурба куорат» МТ дьаһалтатын баһылыга Александр Игнатьевич Иванов, Бүтүн Арассыыйатааҕы уопсастыба Ньурбатааҕы салаатын бэрэссэдээтэлэ Александр Еремеевич Алексеев эҕэрдэ тылынан астылар. Улуус баһылыгын социальнай боппуруоска солбуйааччы Анна Михайловна Уларова, үлэ уонна социальнай харалта управлениетын салайааччыта Ирина Афанасьевна Находкина, СӨ инбэлииттэр региональнай уопсастыбаларын бэрэссэдээтэлэ Ирина Васильевна Лебедева кыттыыны ыллылар.
Олоххо тардыһыылаах, күүстээх санаалаахтар «Фантазии полет и рук творенье…» быыстапкатыгар Күндээдэ, Чаппанда, Сүлэ, Дьаархан нэһилиэктэриттэн уонна Ньурба куораттан кытыннылар.
Тэрээһин үөрүүлээх чааһыгар «Ньурба оройуон» МО баһылыга Алексей Михайлович Иннокентьев СӨ сиргэ сыһыаннаһыы, айылҕа ресурсаларын уонна экология сис кэмитиэтин бэрэссэдээтэлэ Владимир Михайлович Прокопьев Бочуотунай грамоталарын оройуон типографиятыгар 40 сыл эҥкилэ суох таһаарыылаахтык үлэлээбит, уопсастыба чилиэнигэр Семен Никитич Ноговицыҥҥа, инбэлииттэр уопсастыбаларыгар бигэ туруктаах кылааты киллэрсибит аҕам саастаах бэтэрээҥҥэ Петр Николаевич Семеновка, оройуон социальнай харалта управлениетыгар салайааччынан үлэлиир кэмигэр уопсастыба бигэ туруктаах буоларыгар кылаатын киллэрсибит Илья Гаврильевич Тогуллаховка, доруобуйаларынан хааччахтаах дьон ортолоругар теннискэ өрөспүүбүлүкэ аҕыс төгүллээх чөмпүйүөнүгэр, Уһук Илин, Арассыыйа күрэхтэһиилэрин кыттыылааҕар, уопсастыба көхтөөх чилиэнигэр Марк Афанасьевич Васильевка туттартаата.
Үлэ уонна социальнай харалта управлениетын салайааччыта Ирина Афанасьевна Находкина РСФСР социальнай хааччыйыы, Саха сирин социальнай сулууспатын туйгунугар Виктор Алексеевич Васильевка, СӨ инбэлииттэр региональнай уопсастыбаларын бэрэссэдээтэлэ Ирина Васильевна Лебедева уопсастыбаҕа өр сылларга таһаарыылаах үлэтин иһин Степан Степанович Ивановка, СӨ инбэлииттэр региональнай уопсастыба туйгун бэлиэтин, уопсастыба көхтөөх чилиэнигэр Светлана Дмитриевна Гаврильеваҕа, Бүтүн Арассыыйатааҕы инбэлииттэр уопсастыбаларын Махтал суругун Маргарита Макаровна Саввиноваҕа биэрдэ. «Ньурба куорат» МТ баһылыга Александр Игнатьевич инбэлииттэр уопсастыбаларыгар өр сыллаах үлэтинэн, 55 сааһынан Эҕэрдэ суругу Степан Степанович Ивановка туттарда. Ньурбатааҕы компартия I cэкэрэтээрэ Владмир Герасимович Семенов Хомсомуол 100 сыллаах үбүлүөйнэй мэтээлин Александр Еремеевич Алексеевка түөһүгэр ииллэ.
Оройуон баһылыга өрөспүүбүлүкэ ыытар бэлиитикэтигэр, «Доступная среда» РФ Бырагыраамматыгар олоҕуран, улуус, нэһилиэк салалталара тус сыаллаах бырагыраамма ылынан, алмаастан киирэр үптэн доруобуйаларынан хааччахтаах I группалаах инбэлииттэргэ уонна тыыл бэтэрээннэригэр дьиэлэрин чөлүгэр түһэрии үлэтэ ыытыллыбытын туһунан иһитиннэрдэ. Бу бырагыраамма салгыы салҕанан барарын туһунан эттэ. Маны таһынан Ньурбатааҕы инбэлииттэр уопсастыбаларын дьиэтигэр хапытаалынай өрөмүөнү ыытыыга үбүлээһин боппуруоһа быһаарыллан, эһиилги сылга былааҥҥа киирбитин сырдатта.
Социальнай харалта управлениетын салайааччыта Ирина Афанасьевна Ньурба улууһугар 1891 доруобуйаларынан хаачахтаах инбэлиит дьон, инбэлиит оҕо ахсаана — 217 баарын эттэ. Бу сылга Үлэ уонна социальнай эйгэ министиэристибэ 700 тыһ. солкуобай үп көрбүтүттэн 60 инбэлиит туһаммытын бэлиэтээтэ.
Уон ый түмүгүнэн 56 доруобуйаларынан хааччахтаах дьон санаторнай-курортнай эмтэниини, 35 инбэлиит Дьокуускайдааҕы реабилитациялыыр кииҥҥэ Ньурбатааҕы доруобуйаларынан хааччахтаах киинтэн 15 оҕо, Аммаҕа 3 оҕо, 3 улахан дьон реабилитацияны барбыттарын туһунан кэпсээтэ.
2018-19 үөрэх дьылыгар Дьокуускайдааҕы техникумҥа Ньурба улууһуттан 6 доруобуйаларынан хааччахтаах инбэлиит оҕолор үөрэммиттэрин, кырдьаҕастары көрөр отделениеҕа 189 кырдьаҕаһы отделение үлэһиттэрэ дьиэлэринэн сылдьан көрөллөрүн туһунан кылгас иһитиннэрии оҥордо.
Бу күн остуол оонньуутугар хабылыкка, хаамыскаҕа, ДАРСТ-ка күрэхтэһиилэр ыытылыннылар.
СӨ инбэлииттэр региональнай уопсастыбаларын бэрэссэдээтэлэ Ирина Васильевна Лебедева:
— 1988 сылтан үлэлиир Ньурбатааҕы инбэлииттэр уопсастыбалара үлэтэ-хамнаһа күн бүгүн үчүгэй көрдөрүүлээх. Улуус баһылыга Алексеей Михайлович доруобуйаларынан хааччахтаах дьону өйүүр буолан, настарыанньалара көтөҕүллэн үлэлииллэрин көрдүм. Ньурба спорт, култуурунай тэрээһиннэргэ инники күөҥҥэ сылдьар дьоннордоох буолан өрөспүүбүлүкэ күрэхтэһиилэригэр мэлдьи кытталлар. Александр Еремеевич бэрэссэдээтэл буолуоҕуттан инбэлииттэр уопсастыбаларын үлэтэ өрөспүүбүлүкэҕэ тиийэ билиннэ. Инники үлэлии сылдьыбыт бэрэссэдээтэллэр Капиталина Иннокентьевна Харламова, Ким Васильевич Саввинов, Аркадий Иннокентьевич Винокуров доруобуйаларынан хааччахтаах дьоҥҥо сыһыаннаан ылыллар сокуоҥҥа бэйэлэрин этиилэрин киллэрэн үлэлэспит өҥөлөөхтөр, — диэн бэлиэтээтэ.
Түмүккэ быыстапкаҕа кыттыбыт уран тарбахтаахтарга уопсастыба чилиэнэ, быыстапканы тэрийбит Галина Дмитриевна Федорова сертификаттары туттартаата.
Ааптар: Антонина СЕМЕНОВА
This post was published on 24.11.2018 19:54 19:54