Ньурба улууһун баһылыга Алексей Иннокентьев В.А. Петрова аатынан Ньурба улуустар икки ардыларынааҕы кырдьаҕастар уонна инбэлииттэр интэринээт-дьиэлэригэр ыалдьыттаан, Үрүҥ Тунах Ыһыаҕынан истиҥ эҕэрдэтин, баҕа санаатын тиэртэ. Олохтоохторго анаан Айыы Алгыһын сиэрин-туомун биллэр алгысчыттар Иван Герасимович Васильев – Алгыс Уйбаан уонна Алиса Михайловна Иннокентьева толордулар.
Ньурба улууһугар Алгыс Күнэ бэс ыйын 21 күнүгэр ыытыллар.
Алгыс күнүнэн интэринээт кэлэктиибин уонна олохтоохторун улуус баһылыга Алексей Михайлович Иннокентьев, интэринээт-дьиэ дириэктэрэ Изамира Федосьевна Семенова уонна култуура Департаменын салайааччыта Розалия Михайловна Тихонова эҕэрдэлээтилэр. Чэгиэн доруобуйаны, олоххо кɵхтɵɵх сыһыаны, үтүɵ сайыны баҕардылар, култуура үлэһиттэрэ ылбаҕай ырыа нүɵмэрдэрин бэлэхтээн үɵртүлэр.
Изамира Федосьевна интэринээт-дьиэ үлэһиттэрэ уонна олохтоохторо билиҥҥи кэмҥэ 92 % вакциналаммыттарын иһитиннэрдэ, итиэннэ хааччах уhуллан, урукку кэм сиэринэн үɵрэ-кɵтɵ олоруохпут диэн баҕа санаатын биллэрдэ.
Интэринээт дьоно ким мааскалаах куйаас сайыҥҥы салгынна тахсан, ким аһаҕас түннүк аттыгар туран, алгыс тылларын иҥэриннилэр. Улаханнык астыннылар-дуоһуйдулар, санаалыын чэпчээтилэр, дууһалыын долгуйдулар, инникитин барыта этэҥҥэ буоларыгар дьиҥ-чахчы итэҕэйдилэр, суруйда «Ньурба улууһа» МО пресс-сулууспата https://www.instagram.com/gazeta_nyurba_ogni_nyurbu/
This post was published on 21.06.2021 13:57 13:57