Сүлэҕэ Ньурба улууһун ситэриилээх былааһын отчуотугар 37 киһи, тус көрсүһүүгэ 5 киһи сырытта.
Олохтоохтор өртөөһүн саас, күһүн ыытыллыан сөп дуо диэн ыйыталлар. Билигин өртөөһүн ыстараабын кээмэйэ улаатан турар, онон ким даҕаны ылсыбат. «Центрлес» тэрилтэ бэйэтэ үлэтин чэрчитинэн өртөөһүнү ыытар.
Хочуолунай тутуутун бырайыага оҥоһуллан бүтэн экспертизаны ааһыахтаах. Ол кэннэ инвестбырагыраамаҕа 2025-2026 сс. киириэхтээх. Сүлэ баһылыга бу боппуруоска Ил Түмэн депутата Владимир Прокопьевтыын ыкса ситимнээхтик үлэлэһэ сылдьарын эттэ.
Оскуолаҕа уонча радиатор бүөлэнэн турар, сайыҥҥы өттүгэр ыраастыахха баар этэ, ититэр ситим бүтүннүү да уларыйыан сөп этэ дииллэр. Бу боппуруоска үөрэх управлениетын кытары үлэлэһэ сылдьалларын оскуола салалтата иһитиннэрдэ.
Сүлэҕэ сир анныттан ууну хаһан көрдүөхтэрэй диэн ыйыталлар. Эрдэ 100 м дириҥҥэ түһэн көрдөөн көрбүттэрэ даҕаны булбатахтара. Быйыл Таркаайы нэһилиэгэр көрдүөхтэрэ, ол кэннэ былааҥҥа баар.
Физкультура, ОБЖ нэдиэлэҕэ 3 эрэ чаас буолар, ону элбэтиэххэ сөп дуо, спортивнай саала тутуутун, хаһыат сурутуутун, Спортивнай оонньуулар тустарынан, онтон даҕаны атын ыйытыылар киирэн хоруйданнылар.
Сүлэ нэһилиэгин олохтоохторо отчуот түмүгүнэн улуус дьаһалтатын үлэтин биһирииллэрин биллэрдилэр, суруйда «Ньурба» хаһыат.
