Аканаҕа байыаннай дьайыыттан дойдутугар аҕыйах хонукка уоппускатыгар кэлбит буойуну кытта улуус дьаһалтатыгар көрсүһүү тэрилиннэ. Көрсүһүүгэ Акана нэһилиэгин баһылыга Ефрем Семенов кыттыыны ылла, диэн «Ньурба» хаһыат телеграм-ханаала суруйар.
Эдэр байыаска арчылыыр аналлаах саха быһаҕы улуус баһылыга Алексей Иннокентьев аатыттан баһылык солбуйааччыта Наталия Петрова туттарда.
Байыас ааспыт сыл алтынньытыгар баҕа өттүнэн мобилизацияҕа хабыллан барбыт.
Уолбут Днепр өрүс территориятыгар мотострелковай чааска ытык иэһин чиэстээхтик толоро сылдьар. Саха сириттэн онно иккиэ буолан сылдьалларын, сулууспа этэҥҥэ баран иһэрин үллэһиннэ. Улуус баһылыгын солбуйааччы Наталия Петрова уолаттарбыт этэҥҥэ сылдьан, дойдуларыгар доруобай эргиллэн кэлэллэригэр баҕа санаатын эттэ.
Лина Семенова
