От ыйын 17 күнүгэр киэһэ Ньурба улууһугар икки оҕо сүтэллэр. 15 уонна 14 саастаах эрдэҕэс оҕолор сөтүөлүү бараллар, дьиэлэригэр төннүбэттэр, төрөппүттэр Быыһыыр сулууспаҕа биллэрэллэр.
Быһылаан Бордоҥ нэһилиэгин Маалыкай сэлиэнньэтигэр буолла.
Марха өрүскэ 3 — 4 чаас ардыгар оҕолор сөтүөлүү бараллар. Дьиэлэригэр төннүбэтэхтэригэр төрөппүттэрэ көрдүүллэр, биэрэккэ таҥастарын булаллар. Ол кэннэ көрдөөһүн ууга саҕаланар. Олохтоох дьон үс тыынан оҕолору көрдүүллэр.
Ньурбатааҕы көрдүүр-быыһыыр этэрээт үс быыһааччыта миэстэтигэр айанныыллар. Ол истэхтэринэ оҕолору булбуттарын биллэрэллэр. Оҕолор өлүктэрин үс миэтэрэ дириҥҥэ булаллар, илими туһаммыттар.
От ыйын саҕаланыаҕыттан ууга оҕо өлүүлээх түбэлтэ хаһыс да төгүлэ. Быыһааччылар төрөппүттэри оҕолоргутун бэйэлэрин эрэ ыытартан туттунаргытыгар ирдииллэр.
