3 От ыйа 03.07
  • -7°
  • $ 104,68
  • 115,6

Ньурба салалтата ыччат идэни баһылыырыгар көмөлөһөрө этилиннэ

«Маар уола фокусник Дьулустаан Попову бары билэргит буолуо. Бэҕэһээ анаан миигин көрсө кэлэ сырытта», — диэн суруйда Ньурба улууһун баһылыга Алексей Иннокентьев телеграм-ханаалыгар.

5 сыллааҕыта АГИИК үөрэнэ киирэригэр Ньурба улууһун дьаһалтата көмөлөспүт, онно анаан махталын биллэрдэ. Билигин уол ситэн, быйыл үөрэҕин бүтэрэр сыла. Бу сыллар тухары Дьулустаан биллэ сайдан, араас албастарга үөрэнэн, дойдутугар биллэр-көстөр фокусникка тиийэ улаатта, диэн иһитиннэрэр баһылык.

Бэҕэһээ Дьулустаан үөрэҕин бүтэрэн баран салгыы Москваҕа М.Н.Румянцев (Карандаш) аатынан цирка уонна эстрада училищетыгар үөрэнэ, үрдэтинэ барыан баҕалааҕын салалтаҕа биллэрдэ. Биллэн турар, ол үбү-харчыны эрэйэр. Дьулустаан быраатынаан соҕотох ийэ иитэр оҕолоро.

«Үөрэххэ баҕалаах дьону биһиги наар өйүүбүт. Ураты жанрынан дьарыктанар эдэр киһи тохтоон хаалбакка салгыы сайдыахтаах», — диэтэ Алексей Михайлович.

Инньэ гынан, кэпсэтии түмүгүнэн Дьулустаан Попов салгыы үөрэнэригэр анал бырагыраамаҕа киллэрэн оройуон көмөлөһөргө бэлэмин эттэ.

Следите за самым важным и интересным в Telegram-канале и WhatsApp-группе ЯСИА
0
0