15 От ыйа 15.07
  • 26°
  • $ 87,74
  • 95,76

Ньурба нэhилиэктэригэр сайдыы кэлим былааннарын оҥороллор

13:20, 07 декабря 2018
Текст:
Читайте нас на
Яндекс Новости
ЯДВ

Бу нэдиэлэҕэ Ньурбаҕа улуус баһылыгын көһө сылдьар 4-с кыбаарталлааҕы мунньахтара түмүктэннилэр. Чаппандаҕа, Малдьаҕарга, Ньурбачааҥҥа уонна Таркаайы нэһилиэгэр Марха куустатын нэһилиэктэрин актыыба кыттыылаах көрсүһүүлэр буоллулар. Маннык тэрээһиннэргэ, үгэс курдук, бастаан улууска баар федеральнай, өрөспүүбүлүкэ уонна улуус тэрилтэлэрин салайааччылара уонна бэрэстэбиитэллэрэ дьону тус боппуруостарынан консультациялыыллар.


Ньурба улууһугар куустанан мунньахтар түмүктэннилэр. Тыа сирин олохтоохторо наадалаах боппуруостарынан элбэх ыйытыктаах буолаллар, бэйэлэрин этиилэрин уонна туруорсууларын киллэрэллэр. Ол курдук Таркаайыга  приемҥа 50-ча киһи, ол иһигэр улуус баһылыга Алексей Иннокентьевка 10 киһи сырытта.

Баһылыктар 2032 сылга диэри нэһилиэктэрин социальнай-экэнэмиичэскэй сайдыыларын бырагыраамаларын бырайыактарын билиһиннэрдилэр. Кэскиллээх былааннарын торумнаан, элбэх сыыппаралардаах уонна ырытыылардаах дакылааттарыгар сүрүн болҕомтону тыа хаһаайыстыбатын, нэһилиэктэр инженернэй (социальнай) инфраструктураларын сайыннарыыга, оҥорон таһаарыыны уонна саҥа үлэ миэстэлэрин тэрийиигэ уурбуттар. Нэһилиэктэр олохтоохторо уонна тэрилтэлэр салайааччылара ити бырайыактарга туох итэҕэс-быһаҕас баарын,  тугу эбии киллэриэххэ сөбүн кэпсэттилэр. Элбэх ыйытыылар уонна туруорсуулар киирдилэр. Бүлүү уонна Марха өрүстэр киртийиилэрин, ыраас иһэр уунан хааччыйыы, экология боппуруостарын тула элбэх киһи санааларын этиннилэр.

Нэһилиэктэр бу сайдыыларын бырагырааматын кэлэр сыл 1-кы кыбаарталыгар улуус Экэнэмиичэскэй сэбиэтигэр көмүскүөхтэрэ. 2032 сылга диэри нэһилиэктэргэ барыахтаах үлэлэр, ол иһигэр ханнык эбийиэктэр тутуллуохтаахтара барыта чопчуланан былааннаныахтаах.

Улуус баһылыга Алексей Иннокентьев, кини 1-кы солбуйааччыта Артур Яковлев, улуус баһылыгын социальнай боппуруостарга солбуйааччыта Анна Уларова уонна ИСУ салайааччыта, улуус баһылыгын тутууга уонна ОДьКХ-ҕа солбуйааччыта Макар Семенов иһитиннэрии оҥордулар.

Ааптар: Геннадий АНТОНОВ

Следите за самым важным и интересным в Telegram-канале и WhatsApp-группе ЯСИА