Үбүлүөйдээх 2024 сылга “200 сылы көрсө – 200 үтүө дьыала” диэн аахсыйаны Ньурба улууһун үрдүнэн тэрийэн, Дьокуускай куоракка олорор биир дойдулаахтар, “Ньурбакаан” уопсастыбаннай түмсүү кыттыылаахтара биллэриллибит ыҥырыынан салайтаран, Саҥа дьыллааҕы көрсүһүүгэ ааспыт сыл түмүктэрин билиһиннэрдилэр. Айар, ыллыыр, тэрийэр дьоҕурдаах Ньурбаттан төрүттээх дьоммут көрү-нары тардар көрдөөх, дьоһуннаах кэпсэтиини таһаарар дьоҕурдаах Аркадий Саввич тамадалаах, ыҥырыллыбыт ырыаһыттардаах киэһэни тэрийэн ыыттылар.
Бу күн өр сыл көрсүбэтэх биир дойдулаахтар мустан, хоточчу астаах сандалы тула олорон тапталлаах Ньурбаларын, эдэр-эрчим кэмнэрин санаһан,төһө да хас биирдии киһи билиҥҥи кэм суоһуттан көхсүгэр, сүрэҕэр тус санаалаах олордор, инникитин күөх ыраас халлааҥҥа күн тыгыаҕар эрэнэн, саҥа сыл сырдыкка салайыан баҕаран санааларын эттилэр.
Манна даҕатан эттэххэ, «Оо, Ньурбакаан» кыттыылаахтара өйөөн уонна Зинаида Пантелеймоновна, Зоя Никандровна Данилова сүүрэн-көтөн тэрийэн, биир дойдулаахтарын мустулар. Зинаида Пантелеймоновна Григорьева ыалдьыттарга айхал этэн, алгыстаах тойугун туойда, Мария Степановна Бассанова эйэлээх кэми түстүүр оһуохайа дуорайда.
«Оо, Ньурбакаан» чилиэннэрэ Валентина Васильевна Прокопьева, Зоя Никандровна Данилова-Кэкэрдэ Зоя бастыҥ астаах остуол куонкуруһун кыайыылаахтарын биллэрдилэр.
Кэлбит сыл бэлиэтин Луону майгылатан, киэргэтэн оҥоһуллубут салааттаах остуол бириискэ тигистэ, асчыт Мария Михайловна Соловьева бастакы миэстэ буолла.
Ону сэргэ, Ньурба чулуу үлэһит дьоно эмиэ бэлиэтэннилэр.
Ол курдук, Ньурба улууһун мелиорациятын салайааччытынан үтүө суобастаахтык үлэлээбит, «СӨ тыатын хаһаайыстыбатын үтүөлээх үлэһитэ», «СӨ тыатын хаһаайыстыбатын туйгуна», «СӨ тыатын хаһаайыстыбатын бочуоттаах бэтэрээнэ» бэлиэлэрдээх Тоскин Тимофей Тимофеевичка «Почётный старейшина РС(Я)» ааты иҥэрэргэ дастабырыанньаны үлэ бэтэрээнэ, СӨ култууратын туйгуна, Ньурба улууһун Оһуохайын Дархан этээччи, «Алаас ахтылҕана» фольклорнай ырыа ансамблын салайааччы Бассанова Мария Степановна туттарда уонна быйыл Кытайга ырыа күрэҕэр ансаамбылынан ситиһиилээхтик кыттан кэлбиттэрин кэпсээтэ, биир дойдулаахтарыгар саҥа сылга ситиһиилэри баҕарда.
Үлэ бэтэрээнэ, СӨ бочуоттаах кырдьаҕаһа, СӨ доруобуйатын харыстабылын үтүөлээх үлэһитэ, СӨ доруобуйатын харыстабылын туйгуна, Дьокуускай, Ньурба куораттар уонна Ньурба улууһун бочуоттаах олохтооҕо, «Ньырбакаан» сойуус уонна «Алаас ахтылҕана» фольклорнай ырыа ансаамбылын актыыбынай кыттыылааҕа Олимпиада Трофимовна Васильева кэлбит ыалдьыттары эҕэрдэлээн, үтүө санаатын тириэртэ.
Аҕам саастаах биир дойдулаахпыт Семёнова Евдокия Павловна бу күн бастакы ыалдьыкка анаммыт бирииһи тутан үөрдэ-көттө. Саҥа дьыллааҕы харыйаҕа иилэр 1963 сыллааҕы оонньуур кини олоҕор суолтатын кэпсээтэ уонна көрдөрдө. Ону таһынан биир дойдулаахтарыгар Саҥа дьыллааҕы кэһиитин — мас көтөрүн улары аҕалан бириискэ туруорда. Барыларыгар күрэххэ, оонньууга кыттан, кини бирииһигэр тиксэргэ ситиһиилэри баҕарда.
Анастасия Михайловна Семёнова «Күөрэгэй ырыатын» ыллаабытын ыалдьыттар күүстээх ытыс тыаһынан көрүстүлэр уонна «Көмүс куолас» бирииһи тамада Аркадий Саввич туттарда.
«Иис-уус» тэрилтэ инженер-технологынан үлэлээбит, «Ньурба патриота» бэлиэнэн, Ил Түмэн Грамотатынан наҕараадаламмыт салайааччы Саввинова Надежда Ивановна үлэһиттэрин сиэтэн тахсан, үбүлүөйдээх аахсыйаҕа, уопсастыбаннай үлэҕэ кытталларын кэпсээтилэр, биир дойдулаахтарын эҕэрдэлээтилэр.
Кэлбит дьон: “Үтүө хамсааһыны тэрийэн, бүтүн өрөспүүбүлүкэ олохтоохторугар дойду туһугар сомоҕолоһуу, патриотизм, гражданскай эппиэтинэс холобурун көрдөрүөххэ. Биир сомоҕо буолуу суолтатын хас биирдии киһи, ордук эдэр ыччат өйүгэр-санаатыгар тириэрдиэххэ, иитэн-такайан таһаарыахха”, — диэн аахсыйаны өйүүр санааларын этэн, биир дойдулаахтарын ыҥыран, тэрээһини иилээн саҕалаан тэрийбит «Оо, Ньурбакаан» эппиэтинэстээх кыттыылаахтара: Саха сирин култууратын салаатыгар өр сыл үлэлэспит Зинаида Пантелеймоновна Григорьеваҕа уонна Арассыыйа, СӨ доруобуйатын харыстабылын туйгуна, үлэ бэтэрээнэ, куорат уопсастыбаннай үлэтин көҕүлүүрүн иһин Дьокуускай куорат думатын түөскэ кэтиллэр бэлиэтин хаһаайына Зоя Никандровна Даниловаҕа-Кэкэрдэҕэ кэлбит дьон махтал тылларын эттилэр.
Ол кэнниттэн Зинаида Григорьева кэрэ кылыһахтаах сахалыы ырыатынан, Кэкэрдэ үрдүк сопрано куолаһынан бэйэтин ырыатын толорон эҕэрдэлээтилэр.
Бу дьоро киэһэ бары да ырыа ыллаан, тойук туойан, доҕордоһуу оһуохайыгар биир сомоҕо буолан, инникитин да үтүө ыҥырыыларга кыттарга бэлэмнэрин көрдөрдүлэр.
Меценат Степан Осипов этиитин өйөөн, кэлэр үбүлүөйдээх сылбытын көрсө Ньурба улууһун үрдүнэн «200 сылга – 200 үтүө дьыала» аахсыйаҕа кыттарга бэлэмнэрин биллэрбит биир дойдулаахтарбытыгар барҕа махтах буоллун.
“Ньурбакаан” уопсастыбаннай тэрилтэ аатыттан Зоя Данилова — Кэкэрдэ
