7 Алтынньы 07.10
  • -4°
  • $ 60,25
  • 58,24

Ньурба Маарыгар роза сибэккини олордууга маастар-кылаас буолла

Маар нэһилиэгин олохтооҕо Афанасий Васильевич Семёнов кэрэни кэрэхсээн, араас дьэрэкээн сибэкки олордуутунан дьарыктанан Саха сиригэр эрэ буолбакка, Арассыыйа таһымыгар кытта биллэр.

Кини Маар орто оскуолатыгар физкултуура учууталынан үлэлиир,чэпчэки атлетикаҕа оройуон сборнайын тириэньэрэ. 2000 сылтан күн бүгүҥҥэ дылы Манчаары уонна Саха сирин спортивнай оонньууларыгар тириэньэр быһыытынан улуус хамаандатын бэлэмнээн, кытыннаран кэллэ. Сад үүнээйитинэн сөбүлээн дьарыктаммыта балай да буолла. СӨ Үөрэҕириитин министиэристибэтэ уонна «Юные якутяне» ресурснай киини кытары «Стандарт благоустройство образовательных учреждений РС(Я)» бырайыак иитинэн «Цветущий яблоневый сад» бырайыак ааптара буолар.

Афанасий Васильевич тэлгэһитигэр аан бастаан 2019 сыллаахха сылдьан сөҕө-махтайа көрбүтүм. Ол саҕана георгиннар, калибрахоа сибэккилэр таһыгар өйдөбүнньүк хаартыскаҕа түспүппүт. Афанасий Васильевич дьоҥҥо-сэргэҕэ кэрэни кэрэхсииллэригэр анаан «Сибэкки саада» оҥорорго былаанныырын билиһиннэрбитэ. Ол онто ааспыт сыллаахха олоххо киирэн, Ньурба олохтоохторо эрэ буолбакка, Саха сирин араас муннуктарыттан кэлэн кэрэхсээн көрөн бараллар. Афанасий Васильевич тэлгэһэтигэр 400-тэн тахса сибэкки арааһа баар, маны таһынан ыарҕа бөлөх уктаах үүнээйилэр саадын киэргэтэллэр. Бу маны барытын бэйэтэ бүөбэйдээн көрөр-харайар. Аҥардас уу кутааһыныгар 3-тэн тахса чаас, көмөлөһөөччүлээх буоллаҕына 2 чаастан ордук сылдьалларын туһунан этэр.

Субуота күн сибэкки олордуутунан дьарыктанар, кэрэни кэрэхсиир кэрэ аҥаардарга атыылаһыллыбыт роза сибэккилэри көрүүгэ-харайыыга, эмтээһиҥҥэ, саҥа роза сибэккилэри олордооччуларга ханнык суортар барсалларын анаан маастар-кылаас ыытта. Төһө да ардах түстэр, олус интэриэһинэйдик ыытан, дьон кэрэхсэбилин ылла.- Мантан инньэ атырдьах ыйын 26-гар диэри, субуоталарга маастар-кылаастар буолуохтара. Сахабыт сириттэн кэлэн кыттыыны ылыахтара, — диэн билиһиннэрдэ.

Маастар-кылааска улуустааҕы Биисинэс киин салайааччыта Нюргуяна Михайлова кыттыыны ылла, улуус баһылыга Алексей Михайлович Иннокентьев аатыттан «Ньурба улууһун уопсастыбаннай эйгэлэри көҕөрдүүгэ волонтерскай питомник» бырайыага олоххо киирбитинэн эҕэрдэ суругу туттарда.

Улуустааҕы култуура департаменын салайааччыта Розалия Тихонова балаҕан ыйыгар буолуохтаах «Якутия — Миру» норуоттар икки ардыларынааҕы этнофестивальга Ньурба дьоно-сэргэтэ көхтөөхтүк кытталларыгар ыҥырда. Улахан далааһыннаах тэрээһиҥҥэ уус-уран оҥоһуктарынан, бэйэ дьыалатынан дьарыктанааччылар өйөбүл ылыахтара диэн туран, Афанасий Семёновиһы тэрээһиҥҥэ кыттыыны ыларыгар ыҥырда.- Быйылгыттан декоративнай үүнээйилэри үүннэриини саҕалаатым. 2027 сылга Манчаары оонньууларыгар Ньурба Саха сирин кыраһыабай куората буоларын туһугар Ньурбам дьонун ылсыһан үлэлиэҕиҥ, — диэн ыҥырда.

Түмүккэ Афанасий Семёнов биир дойдулааҕа, үөрэнээччитэ, көмүс куоластаах Дора Бурнашева ылбаҕай ырыалары мустубут дьоҥҥо бэлэхтээтэ.Чөл олоҕу, спорду кытары кэрэни кэрэхсиир Афанасий Васильевич сүдү үлэтэ кэнэҕэһин да дьону кэрхсэтэ турдун.

Антонина Семёнова

Огни Нюрбы

Следите за самым важным и интересным в Telegram-канале и WhatsApp-группе ЯСИА
0
0
Тутаах тыллар