Күндээдэҕэ «Влада» кээпэрэтиипкэ үүттэн, эттэн, сир аһыттан араас бородууксуйаны оҥорон таһаарар «автоклав» оборудование аҕалыллыбыта. Билигин таҥан оҥоруутун ситэрэн үлэҕэ киирэр бириэмэтин күүтэллэр. Саҥа саҕалааһыны тыа хаһаайыстыбатын министиэристибэтин, Ньурба улууһун салалтатын бэрэстэбиитэллэрэ кэлэн көрдүлэр.
«Влада» кээпэрэтиип иһитиннэрбитинэн, Күндээдэ нэһилиэгэр СӨ тыа хаһаайыстыбатын миниистирин солбуйааччы Василий Афанасьев салайааччылаах, сүөһүнү иитии Департаменын салайааччыта Артём Александров кыттыылаах оробуочай бөлөх үлэлээтэ. Ньурба улууһун баһылыгын бастакы солбуйааччы А. Я. Яковлев, тыа хаһаайыстыбатын департаменын салайааччыта И. В. Егоров, «Күндээдэ» тэрилтэ генеральнай дириэктэрэ А. П. Алексеев кээпэрэтиип үлэтин-хамнаһын, инники соруктарын кэпсээтилэр-көрдөрдүлэр.
«Влада» кээпэрэтиипкэ кэлэн турар үүтү, эти, сир аһыттан араас бородууксуйаны оҥорон таһаарар «автоклав» оборудованиены көрдүлэр, таҥан оҥоруутун ситэрэн үлэҕэ киирэр бириэмэтин торумнастылар.
Манна ынах, куурусса этиттэн оҥоһуллубут кэнсиэрбэни көрдөрдүлэр, хайдах оҥоһулларын быһаардылар, маннык бородууксуйа оҥоһуллар диэн, бэлэм кэнсиэрбэлэри амсаттылар.
«Күндээдэ» дириэктэрэ Александр Алексеев уонна «Влада» кээпэрэтиип үлэһиттэрэ эт, үүт, сир аһыттан оҥоһуллар бородууксуйа көрүҥэ элбииригэр үлэлииргэ бэлэмнэрин, баҕалаахтарын эттилэр, диэн суруйда Александра Варламова https://www.instagram.com/gazeta_nyurba_ogni_nyurbu/
