Кэлэр ыйтан ыла аны моцарелла, рикотта, качотта курдук аан дойдуга биллибит сыырдары бэйэбит дьоммут астыахтара. Ньурба улууһун күннээх Күндээдэ нэһилиэгэр үрүлүйэ устар үрүҥ илгэни астыыр «Влада» диэн сыах тэриллэн үлэлиир. Оройуоҥҥа сылга 5,5 тыһыынча туонна үүтү туттарар буоллахтарына, Күндээдэ нэһилиэгэ 906 тн., онтон 120 туоннатын бааһынай хаһаайыстыбалар хааччыйаллар.
Күн аайы атыыга тахсар суорат, йогурт, арыы, сүөгэй, быыппах, чохоон таһынан, аны итальянскай деликатес пиццаны, итии сыырдаах бутерброду сөбүлээччилэри үөрдүөҕэ.
«Влада» кэпэрэтиип сүрүн технолога Наталья Данилова: «Быйыл улуус дьаһалтата көмөлөһөн, сыыр оҥорор тэрил атыыластыбыт. Үлэһиттэр Москваҕа итальянскай сыыр: моцарелла, рикотта, качотта оҥорорго Италия асчытыгар үөрэнэн кэллилэр. Онон, от ыйын бүтүүтэ бастакы сыырбытын амсатар санаалаахпыт. Биир-икки ыйга харайыллар салгына суох, вакуумнай хаалары Москваттан атыылаһан аҕалыахпыт.
2017 с. 780 туонна үрүҥ аһы астаан нэһилиэнньэҕэ батарбыппыт. 4 туонна арыыны «Сахаагропродукт» холбоһукка туттарбыппыт. Арыыбыт хаачыстыбатынан Дьокуускайга тыа хаһаайыстыбатын бородууксуйатын дьаарбаҥкатыгар 3 миэстэни ылан, мэтээлинэн наҕараадаламмыппыт. Мииринэйгэ «Бастыҥ үрүҥ ас» ааты ылбыппыт», — диэн билиһиннэрдэ.
Манна дьоҕус кэлэктиип аҥаара – эдэрдэр. «Ыччаты тыа сиригэр олохсутар туһугар СӨ ТХМ иһинэн ИЖС бырагыраамата үлэлиир. 35 диэри саастаах эдэр ыал оройуон хамыыһыйатын ааһан, босхо дьиэ туттар кыахтаналлар. Ортотунан 1,6 мөл. суумалаах тутуу матырыйаалын биэрэллэр. Күндээдэҕэ номнуо 16 ыал дьиэлэннэ, быйыл 4 дьиэ өссө тутулла турар», — диэн олохтоох нэһилиэк дьаһалтатын тыа хаһаайыстыбатын исписэлииһэ Игорь Саввинов кэпсээтэ.
Марианна Тыртыкова, «Саха сирэ», edersaas.ru
