29 Бэс ыйа 29.06
  • -7°
  • $ 104,68
  • 115,6

Ньурбаҕа сааскы ыһыы үлэтэ саҕаланна

«Ньурбатааҕы сүөһү аһылыгын хампаанньата» тэрилтэ быйылгы ыһыы үлэтин саҕалаата. Ыам ыйын 21 күнүттэн Ньурба к. таһынааҕы Кыталыктаах диэн бааһынаҕа 2 тыраахтыр киирэн дискэлии сылдьаллар. Бэҕэһээ улуус баһылыгын 1-кы солбуйааччыта Артур Яковлев киирэн үлэ хаамыытын билистэ. Тэрилтэ тырахтарыыһа Арсен Семенов уонна АГАТУ 3-с кууруһун устудьуоннара Семен Николаев, Остап Слепцов үлэлии сылдьаллар, диэн суруйда улуус дьаһалтатын пресс-сулууспата.

«АГАТУ-га технический сервис диэн инженер идэтигэр 3-с сылбын бүтэрэн эрэбин, — диир Семен Николаев. — Дойдум — куорат Бүлүү, оттон миигин кытта үөрэнэр Остап Слепцов Үөһээ Дьааҥыттан төрүттээх. Манна кэлбитим бэрт буоллаҕа, маннык үлэлээн теорияны кытта практиканы дьүөрэлиирбит көдьүүстээх«.

Артур Яковлев: «Бурдук ыһыытынан дьарыктаммыппыт 3-с сыла. Бастакы дьылбытыгар олус үчүгэйдик үүммүтэ, гаатыттан ортотунан 20-лии цн ылбыппыт. Бу Ньурбаҕа кэнники кэмҥэ мээнэ ситиһиллибэтэх көрдөрүү. Оттон былырыын хара сааскыттан кураан буолан, үүнүү соччо бэрдэ суоҕа. Быйыл 240 гааҕа ыһар былааннаахпыт, ыһыы иэнин 40 гаанан кэҥэттибит. Былырыын паардаммыт, оҥоһуллубут сиргэ ыһыахтаахпыт, онон үчүгэй үүнүү буолуо дии саныыбыт. Соторутааҕыта диэри халлааммыт хаардаан, ардаан сирбит сииктэх, онон санаабыт бөҕөх. Саҥа сиргэ үчүгэй сиэмэ кэллэ, уоҕурдуу баар. Онон «Ньурбатааҕы сүөһү аһылыгын хампаанньата» быйылгы үрдүк ситиһиини ситиһиэҕэр эрэнэбит. Бэс ыйа саҕаланыытыгар ардахтар түстэхтэринэ отой үчүгэй буолуоҕа. Быйыл «Ньурбатааҕы сүөһү аһылыгын хампаанньатыгар» улахан аныгы сиэйэлкэ уонна ыарахан диискэ ыллыбыт. Бааһыналарга сииги саптаран баран, сонно ыһыыга киириэхпит. Быйылгы сонуммут — АГАТУ-ну кытта дуогабар түһэрсэн, инженер-механик идэтигэр үөрэнэ сылдьар устудьуоннар солбуһан практикаҕа кэлэллэр. Билигин 2 уол кэлэн үчүгэйдик үлэлии сылдьаллар. АГАТУ кафедратын сэбиэдиссэйэ Юрий Жигмитович Дондоков хонтуруолаан, бииргэ үлэлэһэ сылдьабыт«.

Ааптар: Геннадий Антонов, Ньурба улууһа.

Следите за самым важным и интересным в Telegram-канале и WhatsApp-группе ЯСИА
2
0