14 От ыйа 14.07
  • 16°
  • $ 87,74
  • 95,76

Ньурбаҕа NYURBA SUMMER FEST ыччат фестивала үрдүк таһымнаахтык ааста

Читайте нас на
Яндекс Новости
ЯДВ

Атырдьах ыйын 27 күнүгэр Антоновкаҕа улуустааҕы NYURBA SUMMER FEST ыччат фестивала үрдүк таһымнаахтык ааста. Барыта 9 нэһилиэктэн 130 көхтөөх ыччат кэлэн 4 көрүҥҥэ күөн көрүстүлэр. Бырайыак көмүскээһинэ, аныгылыы үҥкүү, гитаранан ырыа уонна сыттыгынан киирсии. Бүтэһик күрэх чуолаан дьон биһирэбилин ылла. Хомойуох иһин, Маалыкай эҥэр дэриэбинэлэр бэлэмнээхтэрин үрдүнэн суол суох буолан кыайан киирбэтилэр.

Күрэхтэри таһынан ыччаттарга анаан аһаҕас лекциялар, маастар-кылаастар ыытылыннылар. «Тропа Тенгри», «Финансовая грамотность», «Социальное проектирование» былаһааккаларга анал ыҥырыллыбыт экспертэр үлэлээтилэр. Фестивальга ыҥырыылаах ыалдьыт СР Ыччат политикатын миниистирэ Петр Витальевич Шамаев тэҥҥэ сылдьыста.

Киэһэлик «Диалог на равных» аһаҕас кэпсэтиигэ миниистиргэ уонна Ньурба улууһун баһылыгын солбуйааччытыгар Николай Бурнашевка олус элбэх ыйытыы киирдэ. Олус истиҥ кэпсэтиини Петр Витальевич «Устудьуон доҕорбор» ырыатынан түмүктээтэ.

Бу үөрүүлээх күн Чаппанда нэһилиэгэр өр кэм ыччат специалиһынан үлэлээбит Акулина Семеноваҕа «СР Ыччат политикатын туйгуна» аат иҥэриллибитин бары дохсун ытыс тыаһынан көрүстүлэр. Кырдьык, Лина туох баар ыытыллар тэрээһиннэртэн хаһан даҕаны туора турбат, ыччат сайдыытыгар бэйэтин кылаатын киллэрбит киһинэн буолар.

Киэһэ бары кэтэспит аһаҕас халлаан анныгар Дькуускайтан ынырыллыбыт ырыаһыттар, анал программаларынан Fire-show киэргэттилэр. Сонун ураты программа кэнниттэн мустубут дьон бары салюту астына көрдүлэр. Өтөрүнэн маннык таһымнаах бырааһынньыктар ыччакка анаан буола иликтэр, өссө даҕаны маннык хабааннаах тэрээһиннэри ыытаргыт буоллар диэн баҕа санааларын эттилэр.

Уопсай түмүккэ 3 миэстэҕэ – Маар, 2-с – Акана уонна мунутуур кыайыылааҕынан Антоновка эдэр ыччатын хамаандата таҕыстылар.

Ньурба оройуонун Ыччат политикатын управлениета

Следите за самым важным и интересным в Telegram-канале и WhatsApp-группе ЯСИА