Дьокуускайга «Улахан хаар илгэлээх үтүөтэ» диэн VIII Норуоттар икки ардыларынааҕы поэзия бэстибээлэ саҕаланна. Онно Кытайтан, Монголияттан, Бразилияттан, Ирактан, Казахстантан, ону тэҥэ Россия регионнарыттан ыалдьыттар кытталлар.
«Бэстибээл кыттыылаахтарын икки ардыларыгар кэпсэтии түмүгэр саҥа идеялар, бырайыактар үөскүүллэр. Быһата бу күннэргэ казах эпоһын тылбаастааһын презентацията буолуоҕа. Литература үгэс буолбут култуура акылаата, араас жанрдаах айымньылар эстибэт төрдүлэрэ буолар. Искусство бары практическай көрүҥнэрэ — театр, киинэ — литератураҕа олоҕурар», — диэн бэлиэтээтэ Саха сирин бырабыыталыстыбатын бэрэссэдээтэлин солбуйааччы Сергей Местников.
Бэстибээл чэрчитинэн Дьокуускай куорат үөрэх кыһаларыгар көрсүһүүлэр, радио уонна телевидение биэриилэрэ былааннанар.
«Биһиги өрөспүүбүлүкэбит, Дьокуускай куорат номнуо аҕыс төгүлүн бэстибээли ыытар. Кэлин сылларга өрөспүүбүлүкэ бырабыыталыстыбатын өйөбүлүнэн тэрээһин салҕанан барара буоллар, тоҕо диэтэххэ, кыттааччылар ыраах хотугу сиргэ, Саха Сиригэр маннык бэстибээл ыытыллара олус символическай диэн бэлиэтииллэр. Бырагыраама олус киэҥ: ыччат айар талааннарын арыйар туһугар нэһилиэнньэни кытта көрсүһүүлэр, айар дьон маастар-кылаастара буолуохтара», — диэн култуура уонна духуобунай сайдыы миниистирэ Афанасий Ноев бэлиэтээтэ.
Тэрийээччилэр — Саха сирин культураҕа уонна духуобунай сайдыыга министиэристибэтэ, М.К. Аммосов аатынан Хотугулуу-Илиҥҥи федеральнай университет уонна өрөспүүбүлүкэ суруйааччыларын Союһа.
Норуоттар икки ардыларынааҕы бэстибээл 2012 сылтан ыытыллар. Тэрээһин дойду атын дойдуларыттан уонна регионнарыттан поэттары көрсөр биллэр былаһаакканан буолла. Араас сылларга бэстибээлгэ Турция, Монголия, Великобритания, Вьетнам, Словения, Болгария, Польша, Азербайджан, Казахстан, Кыргызстан, Россия регионнарыттан — Татарстан, Башкортостан, Бурятия, Дагестан, Тыва ыалдьыттара, Москваттан уонна Санкт-Петербургтан тылбаасчыттар, оҥорон таһаарааччылар кытыыны ыллылар.
This post was published on 15.10.2025 11:39 11:39