Ааспыт нэдиэлэҕэ Кэбээйи улууһун Арҕас сэлиэнньэтигэр саха норуодунай суруйааччыта Николай Лугиновтыын көрсүһүү буолла. Кини дойдутугар кэлээт, литературнай музей буолан турар олорбут дьиэтигэр сырытта.
Саха норуодунай суруйааччыта, Кэбээйи улууһун бочуоттаах олохтооҕо Николай Лугинов дойдутугар Арҕаска сырытта. Кэлээт да тэлгэһэҕэ турар сэргэҕэ сүгүрүйдэ, дьонун-сэргэтин, сирин-уотун күндүлээтэ. Дьиэтигэр киирэн музей экспонаттарын, хаартыскаларын көрдө. Эбиэт кэннэ кулууп дьиэтигэр нэһилиэнньэни кытта көрсүһүү тэрилиннэ.
Улуус баһылыга И.И. Левин, Куокуй нэһилиэгин баһылыга Н.В. Винокурова, улуус култууратын управлениетын начаалынньыга И.Л. Левин уо.д.а. атыттар суруйааччыны 70 сааһынан эҕэрдэлээтилэр. Нэһилиэк аатыттан баһылык убаһа сертификатын туттарда. Дьоно-сэргэтэ тоҕуоруһа мустубутуттан Н.А. Лугинов сүргэтэ көтөҕүллэн туран, ханна да сырыттар биир дойдулаахтарын ахтарын-саныырын итиэннэ, манна саамай элбэх аймахтара олороллорун бэлиэтээтэ.
— Манна олорор оҕолору көрдөхпүнэ эдьиийдэрбин, убайдарбын, чугас аймахтарбын көрөр курдукпун, – диэн долгуйан туран этиитин түмүктээтэ. Куокуй нэһилиэгэр умнуллубут биир дьоро киэһэтэ оҕолор хоһоон ааҕыылаах, ырыа-үҥкүү аргыстаах ааста.
Ааптар: Виктор Эверстов
