Сэтинньи 6 күнүгэр Нерюнгрига тулаайах уонна төрөппүт көрүүтэ-истиитэ суох хаалбыт оҕолор Виктор Ждамиров уулуссатыгар тутуллубут тоҕус мэндиэмэннээх дьиэҕэ кыбартыыралары ыллылар.
«Нерюнгри куорат бүгүн төрөөбүт күнүн бэлиэтиир. Бу бэлиэ күн өрөспүүбүлүкэ бырабыыталыстыбата, оройуон дьаһалтата, тутааччылар хамаандалара бииргэ үлэлээһиннэринэн, тулаайах оҕолору өйүүр судаарыстыбаннай бырагыраама чэрчитинэн, уон кыбартыыра күлүүһүн туттарабыт. Дойду президенэ Владимир Путин өйөбүлүнэн бу бырагырааманы салгыы да олоххо киллэриэхпит диэн эрэнэбин. Саҥа дьиэлэммит дьону эҕэрдэлиибин, дьиэҕит мэлдьи кэрэ, аныгылыы буоллун, үгүс сылларга үөрдэ турдун», — диэтэ Ил Дархан Айсен Николаев эҕэрдэ тылыгар.
Дьиэ РФ президенэ Владимир Путин бигэргэппит Нерюнгри куорат маастар-былаанын чэрчитинэн тутулла турар «Р» кыбаарталга баар. Кыбартыыралар толору оҥоһуллубуттар, сантехника уонна куухуна билиитэтэ, хас биирдиилэригэр тыа саҕата уонна куорат көстөр панорамнай лоджиялардаах.
Билигин Нерюнгрига «Р» кыбаарталга итинник дьиэҕэ өссө сэттэ кыбартыыраны биэриигэ бэлэмнииллэр. Бу кыбартыыралар эмиэ тулаайах уонна төрөппүт көрүүтэ-истиитэ суох хаалбыт оҕолорго быйыл сэтинньи ый устата бэриллиэхтэрэ.
Өрөспүүбүлүкэ судаарыстыбаннай бюджетыттан 2025 сыллаахха тулаайах уонна төрөппүт көрүүтэ -истиитэ суох хаалбыт оҕолорго дьиэнэн хааччыйыыга Нерюнгри оройуонугар 88 мөл.солк. тахса үп көрүллүбүт. Нерюнгри «Р» кыбаарталыгар икки олорор дьиэтигэр барыта 17 кыбартыыраны ылбыттар. Өссө икки киһи бэриллибит харчы сертификаттарыгар олорор дьиэлэри бас билиигэ ылбыттар.
Былырыын Нерюнгри оройуонугар 37 тулаайах, төрөппүт көрүүтэ суох хаалбыт оҕо олорор дьиэнэн хааччылынна, 2023 — 41 киһи, 2022 – 12, 2021 — 34.
Саха сиринэн 2021 сылтан 2025 сылга диэри барыта 1187 тулаайах, төрөппүт көрүүтэ-истиитэ суох хаалбыт оҕо олорор дьиэнэн хааччылынна. Итиннэ 4,2 млрд солк. тахса, олортон 611,03 мөл. солк. федеральнай бюджеттан көрүллүбүт.
