«Олоҥхо ыһыаҕыгар бэлэмҥэ элбэх үлэ оҥоһуллубут уонна оҥоһуллар. Үлэ ыытааччыларга барыларыгар махтанабын — тэрийэр кэмитиэккэ, оройуоҥҥа. Түмүктэр көстөллөр, тиһэҕэр тириэрдэр сорук турар, тэтими ыһыктыбакка, култуура эрэ тэрилтэлэрин кытыарбакка, оройуон кэлэктииптэрэ бары туруналлара наадалаах. Барыта сатанарыгар эрэллээхпин», — диэтэ регион баһылыга.
Сүрүн былаһаакканан «Амикан» паарка буолар. Бырайыак рекреационнай кластеры оҥорор — уопсастыбаннай сир биир кэлим сайдыыта уонна «Горизонт» хайыһар баазалаах кини холбоһуга. Былаһааккаҕа 16 регламентнай эбийиэк тутуллар, манна сиэри-туому толоруохтара, сүрүн тэрээһиннэр ыытыллыахтара, үгэскэ кубулуйбут куонкурустар, спорт күрэхтэһиилэрэ буолуохтара. Бүгүҥҥү күҥҥэ бэлэм 40%. Тутуу былаһааккатыгар матырыйаал тириэрдилиннэ.
Култуура бырагырааматыгар 1,5 тыһыынча киһи кыттар, ол иһигэр 250 артыыс судаарыстыбаннай тыйаатыртан, култуура уонна искусство үөрэх тэрилтэлэрин устудьуоннара, бастыҥ самодеятельнай кэлэктииптэр. Эрэпэтииссийэ бэс ыйын 24 күнүттэн саҕаланар.
Олоҥхо ыһыаҕа 70 тэрээһини ыытар. Тоҕус хайысханан 47 куонкурус буолар. Маны сэргэ хоту дойду төрүт олохтоохторун үгэс буолбут туттар малларын оҥорооччулар, декоративнай-прикладной искусство, Саха сирин норуоттарын национальнай таҥастарын куонкурустара ыытыллыахтара. Испэктээктэр, быыстапкалар, тимири уһаарыы, хомуска оонньооһун, презентациялар уонна былыргы национальнай сиэр-туом, ритуал, аһаҕас халлаан анныгар сахалыы киинэни көрдөрүү, айар кэлэктииптэр кэнсиэртэрэ буолуохтара.
Олоҥхо ыһыаҕа от ыйын 4 — 5 күннэригэр буолар.
This post was published on 29.04.2025 13:02 13:02